Read Caribbean Javanese Masmur 31 Bible Online

Masmur 31 - Caribbean Javanese bible

Masmur 31

¹Kanggo juru penyanyi. Masmuré Daved.

²Duh GUSTI, kula ndelik marang Panjenengan, kula supaya aja nganti ngalami kewirangan. Supaya Panjenengan ngentasaké kula awit keadilan Panjenengan,

³Panjenengan supaya ngrungokna marang kula, gelem gelis nyauri! Panjenengan supaya gelem dadi gunung watu panggonan pengayoman kula, bèntèng kekuwatan sing mitulungi kula!

⁴Awit Panjenengan kuwi gunung watu lan bèntèng kula, kula bakal Panjenengan gandèng lan Panjenengan tuntun awit sangka asma Panjenengan.

⁵Panjenengan bakal ngluwari kula sangka jiret, sing dipasang karo wong kanggo kula, awit Panjenengan sing dadi pangungsèn kula.

⁶Nyawa kula, kula pasrahké ing tangan Panjenengan; duh GUSTI, Gusti Allah sing setia tuhu, Panjenengan sing ngluwari kula.

⁷Panjenengan sengit marang wong sing nyembah marang brahala sing tanpa guna, nanging kula pertyaya marang GUSTI.

⁸Kula bakal surak-surak kebungahan awit kawelasan Panjenengan, awit Panjenengan weruh kangèlan kula lan ndelok karepotané nyawa kula,

⁹lan Panjenengan ora masrahaké kula ing tangané mungsuh, nanging Panjenengan kuwatké mlakuné sikil kula ing lemah sing jembar.

¹⁰Duh GUSTI, supaya kula Panjenengan welasi, awit kula rumangsa susah; mripat, nyawa lan awak kula nglemprek awit susah.

¹¹Awit urip kula dipangan karo kasusahan lan tauné umur kula pada entèk karo sambat nggresah; kekuwatan kula suda awit sangka kasangsarané kula, lan balung kula pada gapuk.

¹²Kula dadi omongané mungsuh kula, lan njalari wediné para tangga teparo kula, apa uga nggawé kagèté para kantya kula; wong sing pada ngerti kula ing dalan, terus pada mblayu.

¹³Kula wis ilang sangka pengéling-éling kaya wong mati, kahanané kula kaya barang sing wis petyah.

¹⁴Awit kula krungu wong okèh pada bisik-bisikan, - kula dikepung karo rasa wedi - pada komplotan bakal nglawan marang kula, arep njabut nyawa kula.

¹⁵Nanging kula pertyaya marang Panjenengan, duh GUSTI, kula ngomong: “Panjenengan kuwi Gusti Allah kula!”

¹⁶Urip kula kuwi ing tangan Panjenengan, Panjenengan supaya gelem ngutyuli kula sangka tangané para satru kula lan wong sing pada ngoyak-oyak kula!

¹⁷Praupan Panjenengan supaya madangi abdi Panjenengan, slametké kula awit sangka kawelasan Panjenengan!

¹⁸Duh GUSTI, kula supaya aja nganti Panjenengan tégakké ing sak njeruhné ngalami kewirangan, awit kula nyebut marang Panjenengan; wong duraka kuwi ya bèn pada ngalami kewirangan meduna menyang panggonané wong mati karo meneng.

¹⁹Kabèh lambé goroh ya bèn dadi bisu, sing ngèlèk-èlèk marang wong jujur karo kemetak lan nyepatani!

²⁰Tenan lubèr kabetyikan Panjenengan sing dityawiské marang wong sing ngajèni Panjenengan, sing wis Panjenengan tindakké marang wong sing pada ndelik marang Panjenengan, ing ngarepé manungsa!

²¹Kuwi pada Panjenengan delikké ing pangayomané praupan Panjenengan, awit sangka anané komplotané wong; pada Panjenengan ayomi ing tarupé supaya utyul sangka tuduhané ilat okèh.

²²Pinujia GUSTI, awit katrésnané diduduhké marang aku karo tyara sing nggumunaké waktu aku katekan ing kangèlan!

²³Awit sangka bingung kula, kula ngira: “Kula wis kebuwang sangka mripat Panjenengan.” Nanging waktu kula sambat marang Panjenengan, Panjenengan terus nuruti marang sambat kula.

²⁴Hé sak kabèhé para katrésnané Gusti, pada trésnaa marang GUSTI! GUSTI njaga para wong sing setia, nanging sing gemunggung diwales tenan.

²⁵Kabèh wong sing ngarep-arep marang GUSTI, pada sing kuwat lan sing kendel atimu!