Read Caribbean Javanese Masmur 33 Bible Online

Masmur 33 - Caribbean Javanese bible

Masmur 33

¹Hé para wong bener, pada surak-suraka ing GUSTI! Awit wis sak mestiné, yèn wong tulus atiné pada memuji.

²Pada pasraha maturkesuwun marang GUSTI karo siter, kidungna masmur karo harep senar sepuluh.

³Kidungna kidungan anyar; sing titis tabuhanmu karo swara sing ramé!

⁴Sebab tembungé GUSTI kuwi nyata, samubarang kabèh ditindakké karo setia tuhu.

⁵Panjenengané seneng marang sing bener lan adil; bumi kebak karo katrésnané GUSTI.

⁶Kabèh langit pada digawé karo pitutur-pituturé GUSTI, kabèh lintangé karo napasé tutuké GUSTI.

⁷Banyuné segara diklumpukké kaya bendungan, segara gedé dilebokké ing wadah.

⁸Sak lumahé bumi bèn pada wedi marang GUSTI, wong sak isiné ndonya bèn pada gemeter ing ngarepé!

⁹Awit Panjenengané ngetokké tembung, kabèh terus dadi; Panjenengané préntah, kabèh terus ana.

¹⁰GUSTI nggagalké rantyamané para bangsa; murungké rantyamané para taleré bangsa;

¹¹nanging karepé GUSTI kuwi tetep selawasé, lan rantyamané ati-Né kuwi turun-temurun.

¹²Rahayu bangsa sing nganggep GUSTI dadi Gusti Allahé, lan taleré bangsa sing dipilih kuwi dadi duwèké!

¹³GUSTI nyawang sangka swarga, lan weruh kabèh anaké manungsa;

¹⁴sangka omahé weruh kabèh isiné bumi.

¹⁵Kabèh pada dibangun atiné, lan digatèkké apa sak penggawéané.

¹⁶Keslametané ratu kuwi ora jalaran sangka gedéné pangwasané; suradaduné kuwi ora bakal ditulungi awit sangka gedéné kekuwatané.

¹⁷Jaran kuwi muspra yèn marakké menang, lan kekuwatané sing ngidap-idapi ora njalari bisa utyul.

¹⁸Lan mripaté GUSTI weruh wong sing pada wedi marang Panjenengané, lan ngentèn-entèni marang katrésnané,

¹⁹supaya nyawané utyul sangka pati, lan pada diuripi ing waktu patyeklik.

²⁰Nyawa kita ngentèn-entèni marang GUSTI. Panjenengané kuwi pitulungan lan tamèng kita.

²¹Tenan ati kita bungah awit sangka Panjenengané, awit kita pertyaya marang asmané sing sutyi.

²²Duh GUSTI, kawelasan Panjenengan mbarengi kita, kaya pengarep-arep kita marang Panjenengan.