Read Caribbean Javanese Masmur 34 Bible Online

Masmur 34 - Caribbean Javanese bible

Masmur 34

¹Masmuré Daved, waktu étok-étok dadi wong sing owah pikirané ing ngarepé Abimèlèk, nganti ditundung, terus lunga.

²GUSTI arep tak puji selawasé; pamuji marang Panjenengané tetep ing tutukku.

³Awit sangka GUSTI nyawaku rumangsa mulya; wong sing andap asor atiné bèn pada krungu lan pada bungah.

⁴Hayuk pada ngluhurké GUSTI bareng karo aku, hayuk pada bebarengan ngluhurké asmané!

⁵Aku wis nggolèki GUSTI, terus disauri, lan diluwari sangka sembarang sing ndadèkké wediku.

⁶Pada mandenga marang GUSTI, praupanmu mesti bakal pada bungah-bungah, lan mesti ora bakal pada kewirangan.

⁷Wong sing ditindes pada sambat, terus digatèkké karo GUSTI; lan diluwari sangka sak kabèhé kasangsarané.

⁸Mulékaté GUSTI ngamping-ngampingi wong sing ngajèni marang Panjenengané, lan pada ditulungi.

⁹Maraa pada ngrasakna lan nyawanga sepira gedéné kabetyikané GUSTI kuwi! Rahayu wong sing ngungsi marang Panjenengané!

¹⁰Hé para duwèké Gusti sing sutyi, pada wedi lan ngajèni marang GUSTI, wong sing wedi lan ngajèni marang GUSTI pada ora kekurangan apa-apa.

¹¹Singa enom pada ngalami ringkih lan kaliren, nanging wong sing nggolèki GUSTI pada ora kekurangan sembarang sing betyik.

¹²Hé para botyah, pada rungokna pituturku, kowé pada tak wulangi wedia lan ngajèni marang GUSTI.

¹³Sapa sing seneng urip, sing kepéngin umur dawa supaya bisa ngrasakaké sing betyik?

¹⁴Ilatmu pekaken aja nganti nggelarké tembung ala lan lambému aja ngutyapké sing goroh;

¹⁵ngedohana sing ala, nglakonana sing betyik, ngupayaa marang rukunan lan uberen nganti ketyekel!

¹⁶Mripaté GUSTI weruh wong bener, lan kupingé ngrungokké sambaté;

¹⁷praupané GUSTI nglawan para wong sing nggawé ala, supaya pengéling-éling kanggo wong-wong mau dientèkké sangka bumi.

¹⁸Yèn para wong bener sambat marang GUSTI, terus digatèkké, lan pada diluwari sangka kabèh kasangsarané.

¹⁹GUSTI ing sak tyedaké para wong sing remuk atiné, lan para wong sing semplak pikirané pada dipitulungi.

²⁰Wong bener kuwi okèh sangsarané, nanging diluwari karo GUSTI sangka sak kabèhé kuwi kabèh,

²¹Panjenengané njaga balung-balungé, nganti ora ana sing tugel siji-sijia.

²²Wong duraka bakal dipatèni karo kasangsarané, lan sapa sing sengit marang wong bener, mesti olèh ukuman.

²³GUSTI ngluwari nyawané para abdiné, lan kabèh wong sing pertyaya marang Panjenengané ora bakal diukum.