Read Caribbean Javanese Masmur 35 Bible Online

Masmur 35 - Caribbean Javanese bible

Masmur 35

¹Masmuré Daved. Duh GUSTI, Panjenengan supaya nglawan wong sing pada bebantahan karo kula, supaya merangi wong sing pada merangi kula.

²Panjenengan supaya gelem nggawa tamèng lan gantol, Panjenengan supaya gelem ngadek mitulungi kula.

³Panjenengan supaya gelem ngetokké tumbak karo pedang kanggo nglawan para wong sing pada ngoyak kula; lan Panjenengan supaya gelem ngomongké marang nyawa kula: “Aku sing mitulungi kowé.”

⁴Wong sing pada arep njabut nyawa kula supaya pada kisinan lan kewirangan, lan sing ngupaya marang sangsara kula supaya pada mundur lan kisinan.

⁵Pada kaya kulit gabah kabur kanginan, yèn pada diuber karo Mulékaté GUSTI.

⁶Dalané dadia peteng lan lunyu, lan pada diuyaka karo Mulékaté GUSTI.

⁷Tanpa jalaran anggèné masang kala-jiret marang kula, tanpa jalaran anggèné ngeduk juglangan kanggo kula.

⁸Wong kuwi tekanana karo tyilaka sing ora kenyana-nyana, lan kejireta karo jiret sing dipasang déwé, ya bèn tiba nganti entèk!

⁹Nanging kula bakal surak-surak awit sangka GUSTI, lan bakal seneng-seneng awit sangka pawèhé pitulungan-Né.

¹⁰Balungku kabèh bakal ngomong mengkéné: “Duh GUSTI, sapa sing kaya Panjenengan, sing ngluwari wong kasusahan sangka tangané wong sing liwat kuwat tenimbang dèwèké, lan sing ngluwari wong sangsara lan mlarat sangka tangané sing ngrampok?”

¹¹Seksi sing seneng marang duraka pada njedul, pada nuntut ing bab sing ora kula ngertèni.

¹²Kabetyikan kula diwales ala, nganti nyawa kula dadi semplak.

¹³Nanging kanggo kula, waktu wong kuwi pada lara, kula nganggo salin kasusahan, kula nyèksa awak kula karo pasa, lan pandonga kula tukul malih ing ati kula,

¹⁴kaya-kaya kantya kula utawa sedulur kula sing lara, kaya mengkéné tumindak kula; kula tansah ngalami susah kaya wong sing dipatèni ibuné, mlaku kula tansah ndingkluk karo nganggo salin kasusahan.

¹⁵Nanging bareng kula kesandung lan tiba, terus pada bungah lan nglumpuk, pada nggrombol nglawan kula; wong sing ora kenal karo kula, pada nyatyat kula tanpa mandek-mandek;

¹⁶anggèné ngétyé kula kaya tyarané wong dursila, karo nggeget-nggeget untuné marang kula.

¹⁷Duh Gusti, nganti kapan enggèn Panjenengan mung ngewaské waé? Nyawa kula supaya Panjenengan tulungi sangka pangrusaké wong-wong kuwi, lan sangka singa-singa enom!

¹⁸Kula terus bakal ngidungké maturkesuwun marang Panjenengan ing pasamuan gedé, Panjenengan bakal kula luhurké ing sak tengahé rayat okèh.

¹⁹Wong sing pada nyatru marang kula tanpa sebab, kuwi aja nganti pada bungah-bungah ing bab kula, wong-wong sing pada sengit marang kula tanpa sebab, aja nganti ngedap-ngedèpké mripat.

²⁰Sing dirembuk duduk rukunan, malah pada ngrantyam penggawé ngrusak kanggo nglawan wong ing negara sing uripé pada rukun.

²¹Apa malih pada bengak-bengok tembungé marang kula; tembungé: “Sukur, sukur, mripatku wis weruh!”

²²Duh GUSTI, Panjenengan sing wis weruh, supaya Panjenengan aja meneng waé, duh Gusti, supaya aja nganti ngedohi kula!

²³Panjenengan supaya gelem tangi lan gelem ngadek mbélani wewenangé kula, duh Gusti Allah kula lan Gusti kula, Panjenengan supaya gelem mbélani perkara kula.

²⁴Duh GUSTI, Gusti Allah kula, Panjenengan supaya gelem ngadili kula sing sak mestiné karo keadilan Panjenengan, supaya wong kuwi aja nganti pada bungah-bungah karo bab kula!

²⁵Aja nganti pada ngomong mengkéné: “kaya mengkono kuwi sing pada kita karepaké.” Utawa ngomongé: “Saiki dèwèké wis kita untal!”

²⁶Pada ngalami kisinan lan isin bebarengan, wong sing pada bungah-bungah awit sangka sangsara kula, wong sing pada nyombongi kula, pada ngalami kisinan.

²⁷Wong sing pada kepéngin ngerti kula dibenerké, kuwi ya bèn pada surak-surak lan bungah-bungah! lan tansah pada ngomong mengkéné: “GUSTI kuwi gedé, sing ngarepké keslametané abdi-Né!”

²⁸Malah ilat kula bakal tyerita keadilan Panjenengan, lan memuji Panjenengan sedina muput.