Read Caribbean Javanese Masmur 37 Bible Online

Masmur 37 - Caribbean Javanese bible

Masmur 37

¹Masmuré Daved. Aja nesu awit sangka wong sing nglakoni ala, aja mèri marang wong sing ala;

²awit kuwi bakal gelis pada alum kaya suket, utawa alum kaya tetukulan sing ijuh.

³Pertyayaa marang GUSTI lan nandangana kabetyikan, tetepa manggon ing negara lan tumindaka sing setia,

⁴lan bungaha awit sangka GUSTI, dadiné kowé mesti dikèki apa kepénginan atimu.

⁵Uripmu dipasrahké marang GUSTI lan pertyayaa marang Panjenengané, Panjenengané sing bakal tandang.

⁶Panjenengané bakal njedulké kebeneranmu kaya pepadang, lan wewenangmu kaya padangé rina.

⁷Kowé menenga ing ngarepé GUSTI lan ngarep-arepa marang GUSTI, aja nesu awit wong sing kepénak uripé, lan awit sangka wong sing nglakoni ala.

⁸Buwangen nesumu lan tinggalen panasé atimu kuwi, aja nesu, kuwi mung nekaké penggawé ala.

⁹Awit wong mlaku ala mesti bakal dientèkké, nanging wong sing ngentèn-entèni GUSTI kuwi bakal pada olèh warisan bumi.

¹⁰Awit waktuné mung kari setitik, wong duraka terus bakal entèk; lan tilas panggonané waé yèn kok gatèkké ya wis ora ana menèh.

¹¹Nanging wong sing andap asor kuwi bakal pada olèh warisan bumi, lan bakal bungah-bungah awit ngrasakaké katentreman sing gedé.

¹²Wong duraka ngrantyam pitenah nglawan wong bener, lan nggeget-nggeget untuné ing ngarepé.

¹³Nanging diguyu karo Gusti, awit Gusti ngerti, yèn dinané wong kuwi wis tyedak.

¹⁴Wong duraka pada ngelungké pedangé lan mentèng gandéwané arep matèni para wong sing sangsara lan mlarat, lan sing jujur mlakuné.

¹⁵Nanging pedangé bakal mbalik lan nyuduk awaké déwé, gandéwané pada tugel.

¹⁶Setitika waé barang duwèké wong bener kuwi luwih apik tenimbang karo lubèr-lubèré bandané wong duraka.

¹⁷Awit tangané wong duraka bakal pada ditugel, nanging wong bener kuwi dikuwatké karo GUSTI.

¹⁸GUSTI ndelok dinané wong sutyi, warisané bakal tetep ing selawasé;

¹⁹ing dina kangèlan ora bakal kewirangan, lan ing waktu patyeklik ya bakal kewareken.

²⁰Nanging wong duraka mesti bakal pada entèk lan mungsuhé GUSTI bakal pada entèk kaya apiké suket ing pangonan; pada entèk, pada entèk kaya kebul.

²¹Wong duraka utang, nanging ora nyaur, nanging wong bener kuwi kebak welas lan seneng pawèh.

²²Wong sing kaberkahan karo Gusti kuwi pada olèh warisan bumi, nanging sing kena karo bendu kuwi pada dientèkké.

²³Jangkahé wong dikuwatké karo GUSTI, angger mlakuné wong mau dadi senengé Gusti;

²⁴yèn tiba ora nganti ngglétak, awit GUSTI nyekel tangané.

²⁵Wiwit aku ijik nom nganti saiki wis tuwa, aku durung tau weruh wong bener ditégakké, utawa anak putuné pada njaluk-njaluk pangan;

²⁶saben dina nindakké kawelasan lan ngutangi, lan anak putuné pada dadi berkah.

²⁷Ngedohana marang sing ala lan nglakonana kabetyikan, mesti panggonanmu tetep ing sak lawas-lawasé;

²⁸awit GUSTI nrésnani keadilan, lan ora bakal négakké marang para sing ditrésnani. Malah pada dirumati selawasé, nanging para turunané wong duraka pada dientèkké.

²⁹Para wong bener pada olèh warisan bumi lan tansah manggon ing kono.

³⁰Tutuké wong bener kuwi nggelarké kawityaksanan, lan ilaté ngutyapké keadilan.

³¹Angger-anggeré Gusti Allahé ing batiné, mlakuné ora gloyoran.

³²Wong duraka ndingkik wong bener ngarah patiné;

³³nanging ora dipasrahké karo GUSTI ing tangané, Panjenengané ora bakal meneng waé yèn dèwèké diadili dianggep duraka.

³⁴Pada ngarep-arepa marang GUSTI lan mlakua ing dalané, mesti kowé terus diangkat supaya olèh warisan bumi, lan kowé bakal pada weruh para wong duraka ditumpes.

³⁵Aku weruh sakwijiné wong duraka sing gemunggung; sing mekar kaya wit tyemara ing Libanon.

³⁶Waktu aku liwat, kok wis ora ana; tak golèki nanging ora ketemu.

³⁷Pada titènana kanggo wong bener lan delengen wong sing temen, awit wong sing seneng rukun kuwi kahanané bakal nyenengké ing mbésuk mburiné;

³⁸nanging wong mursal pada ditumpes bebarengan, lan para wong duraka pengarep-arepé mbésuk bakal dientèkké.

³⁹Para wong bener kuwi dipitulungi karo GUSTI; Panjenengané sing dadi pengayomané ing waktu kangèlan;

⁴⁰bakal pada ditulungi karo GUSTI lan diluwari, pada diluwari sangka tangané para wong duraka lan awit pada nylametké marang Panjenengané.