Read Caribbean Javanese Masmur 38 Bible Online

Masmur 38 - Caribbean Javanese bible

Masmur 38

¹Masmuré Daved waktu masrahaké kurban pengéling-éling.

²Duh GUSTI, kula supaya aja nganti diukum sak njeruhné bebendu Panjenengan, lan kula aja nganti dibanda ing njeruhné panasé-nesuné Panjenengan;

³awit kula katekan panah Panjenengan, tangan Panjenengan wis nibani kula.

⁴Daging kula ora ana sing waras awit sangka bebendu Panjenengan, balung kula ora ana sing slamet awit sangka dosa kula;

⁵awit kesalahan kula wis nibani marang sirah kula kabèh kuwi kaya momotan sing liwat aboté lan kabotan kanggo kula.

⁶Korèng kula mambu ora énak, ngemu nanah awit sangka bodo kula.

⁷Kula nganti mbungkuk, nganti ndingkluk banget; sedina muput enggèn kula mlaku karo nganggo salin kasusahan.

⁸Bangkèkan kula kebak tatu, lan daging kula ora ana sing utuh;

⁹kula nglumpruk, kentèkan kekuwatan, kula sambat awit ati kula tratapan.

¹⁰Duh Gusti, Panjenengan weruh kabèh kepénginan kula, lan ora tak delikké sambat kula.

¹¹Ati kula tratapan, kekuwatan kula entèk, lan mripat kula ilang semloroté.

¹²Kantya lan kenalan kula pada sumingkir, awit sangka lara kula, lan sanak sedulur kula pada ngedohi.

¹³Wong sing ngarah nyawa kula pada masang kala-jiret, sing ngarepké tyilaka kula pada ngrantyam bakal ngrusak kula, lan saben dina ngrantyam ngapus.

¹⁴Nanging kula kaya wong budek, ora krungu, lan kaya wong bisu, sing ora mbukak tutuké.

¹⁵Malah kaya wong sing ora krungu, lan tutuké ora bisa mbantahi.

¹⁶Nanging Panjenengan sing kula arep-arep, duh GUSTI; Panjenengan sing bakal nyauri, duh Gusti Allah kula.

¹⁷Gagasan kula mengkéné: “Anggeré wong kuwi aja nganti bungah-bungah awit sangka kula, aja nganti gemunggung yèn sikil kula gloyoran!”

¹⁸Awit kula bakal tiba jalaran kesandung, lan kula tansah diganggu karo lara.

¹⁹Nanging kula ngakoni kesalahan kula, kula melung-melung awit sangka dosa kula.

²⁰Mungsuh kula okèh banget, lan okèh wong sing sengit marang kula tanpa sebab;

²¹wongé mbales ala marang kula gantiné sing apik, pada mungsuhi kula, awit kula nguber marang sing betyik.

²²Duh, Gusti Allah kula, GUSTI, supaya aja négakké kula, aja ngedohi kula.

²³Supaya gelis mitulungi kula, duh Gusti, Juruslamet kula!