Read Caribbean Javanese Masmur 41 Bible Online

Masmur 41 - Caribbean Javanese bible

Masmur 41

¹Kanggo juru penyanyi. Masmuré Daved.

²Rahayu wong sing nggatèkké marang wong sing ringkih! Wong kuwi bakal ditulungi GUSTI ing waktu ngalami sangsara.

³GUSTI bakal ngayomi lan ngrumati nyawané, nganti diarani wong beja ing bumi; Panjenengan ora bakal nglilani dèwèké dienggo dolanan karo mungsuhé!

⁴Yèn ngalami lara, diréwangi karo GUSTI ing peturoné, Panjenengan maraské larané babar pisan.

⁵Kanggo aku, omonganku mengkéné: “Duh GUSTI kula supaya Panjenengan welasi, kula supaya Panjenengan waraské, awit enggèn kula nggawé dosa kuwi marang Panjenengan.”

⁶Mungsuhku pada nyatur aku ala: “Mbésuk kapan matiné wong kuwi, lan entèkké jenengé?”

⁷Wong sing tilik aku, rembukané goroh: atiné kebak sing ala, bareng metu kuwi diomong-omongké.

⁸Kabèh wong sing sengit marang aku pada bisik-bisikan bab aku, pada ngrantyam sing ala marang aku:

⁹“Wong kuwi wis ngalami lara sing ndrawasi, enggoné ngglétak ora bakal bisa tangi menèh.”

¹⁰Uga kantyaku sing tak pertyaya, sing mangan bebarengan karo aku, kuwi uga ngetungké tungkaké marang aku.

¹¹Nanging Panjenengan duh GUSTI, supaya gelem melasi kula lan jejekké kula, kula terus bakal mbales marang wong-wong kuwi.

¹²Awit sangka mengkéné kula ngerti, yèn Panjenengan seneng marang kula, kuwi menawa ora dadi dalané satru kula terus surak-surak.

¹³Nanging kula, Panjenengan bopong kula, awit sangka temen kula, lan Panjenengan jejekké ing ngarepé Panjenengan ing sak lawas-lawasé.

¹⁴Pinujia GUSTI, Gusti Allahé Israèl, wiwit ing kelanggengan tekan ing kelanggengan! Amin, Amin.