Read Caribbean Javanese Masmur 42 Bible Online

Masmur 42 - Caribbean Javanese bible

Masmur 42

¹Kanggo juru penyanyi. Kidung piwulang masmur turunané Korah.

²Kaya ngelaké kidang marang banyuné kali, ya mengkéné kangen nyawa kula marang Panjenengan, duh Gusti Allah.

³Nyawaku ngelak marang Gusti Allah, marang Gusti Allah sing urip, mbésuk kapan enggonku dililani nemoni weruh Gusti Allah?

⁴Luhku sing dadi panganku awan lan wengi awit sedina muput aku diomongké karo wong mengkéné: “Gusti Allahmu ing ngendi?”

⁵Iki bakal tak éling-éling, sak njeruhné nyawaku sedih lan lemes: awit wong okèh banget kepriyé bisané maju ndisiki wong-wong kuwi menyang griyané Gusti Allah karo surak-surak lan mujèké kidung maturkesuwun, ing keraméané wong-wong sing pada nganakké riyaya.

⁶Duh nyawaku, kenèng apa kok ndingkluk, lan ngolang-ngaling ing njeruhku? Ngarep-arepa marang Gusti Allah, awit Panjenengané bakal tak puji, Panjenengané sing dadi Pitulunganku lan Gusti Allahku!

⁷Nyawa kula ndingkluk ing njeruh kula, mila kula terus kèlingan marang Panjenengan, sangka lemahé laut Yordan lan ing pegunungan Hèrmon, sangka gunung Misar.

⁸Segara gedé tyeluk-tyelukan sak njeruhné ombaké segara gedé, bareng karo swarané grojokané Panjenengan; kula kegulung karo kabèh swarané lan ombak Panjenengan.

⁹Ing wayah awan GUSTI mréntahké kawelasan, lan ing wayah mbengi aku mujèké kidungan, pandonga marang Gusti Allahé uripku.

¹⁰Tembungku marang Gusti Allah gunung watuku mengkéné: “Kenèng apa déné Panjenengan ora éling kula? Kenèng apa déné kula kudu urip karo nganggo salin kasusahan awit sangka panindesé satru?”

¹¹Wong sing nyatyat kula kuwi, kaya nyubles-nyubles balung kula, sedina muput tansah ngomongké bab kula mengkéné: “Gusti Allahmu ing ngendi?”

¹²Duh nyawaku, kenèng apa kok ndingkluk? Kenèng apa kok ngolang-ngaling ing njeruhku? Ngarep-arepa marang Gusti Allah! Awit Panjenengané tak puji menèh, Panjenengané sing dadi Pitulunganku lan Gusti Allahku!