Read Caribbean Javanese Masmur 45 Bible Online

Masmur 45 - Caribbean Javanese bible

Masmur 45

¹Kanggo juru penyanyi. Miturut nyanyian: Kembang bakung. Sangka turunané Korah. Kidung piwulang: kidung katrésnan.

²Atiku nerusaké tembung sing ngresepké, aku arep masrahaké nyanyianku marang ratu; ilatku kuwi dadi pateloté juru tulis sing pinter.

³Sampéyan kuwi sing ngganteng déwé ing antarané kabèh para anaké manungsa, ilat sampéyan kesokan kawelasan, mulané sampéyan wis diberkahi karo Gusti Allah sak lawas-lawasé.

⁴Sengkelit pedang sampéyan, sampéyan pahlawan, ing njeruhné kaluhuran lan kamulyan sampéyan!

⁵Ing njeruhné kamulyan sampéyan kuwi majua kanggo kabeneran, kanggo kamanungsan lan keadilan! Asta sampéyan tengen supaya ngekèki piwulang marang sampéyan bab penggawéan sing ngidap-idapi!

⁶Panah sampéyan pada landep-landep nyubles atiné para mungsuh-mungsuhé ratu, para bangsa pada sendeku ing ngisoré sampéyan.

⁷Dampar kuwi duwèké Gusti Allah, kanggo sak terusé lan sak lawasé, tekené kraton sampéyan kuwi tekené kabeneran.

⁸Sampéyan seneng marang keadilan lan geting marang duraka; mila Gusti Allah, Gusti Allah Panjenengan wis nglengani sampéyan karo lenga kanggo tanda kebungahan ngliwati para kantya golongan sampéyan.

⁹Klambiné sampéyan kabèh mambu blendok mur, kayu garu lan tyendana, sangka kraton gading swarané siter nggawé senengé atiné sampéyan;

¹⁰para anaké wadon ratu pada olèh katrésnan sampéyan, ratu wadon njagong ing tengen sampéyan, nganggo klambiné emas sangka Ofir.

¹¹Duh anaké wadon, delengen, lan supaya gelem mbukakké kupingmu, nglalèkké bangsamu lan kabèh isiné omahé bapakmu!

¹²Ratu supaya seneng awit sangka ayuné uripé sampéyan, awit kuwi bendaramu! nyembaha ing ngarepé.

¹³Anaké wadon Tirus nemoni nggawa pisungsung; para wong sugih ing antarané rayat pada nemoni bakal nggolèk lem-leman sampéyan.

¹⁴Anaké wadon ratu kuwi dadi ayuné ing njeruh, saliné disulami bolah emas.

¹⁵Enggoné diadepké ing ngarepé ratu nganggo klambiné bakal mori werna-werna, ditutké karo para prawan kantyané, ya kuwi para sing pada dityeluk kanggo Piyambaké.

¹⁶Kuwi pada diadepké karo sukak-sukak lan surak-surak, pada mlebu ing kratoné ratu.

¹⁷Para anak sampéyan apiké pada nggentèni para leluhur sampéyan, lan pada sampéyan tetepké dadi penggedé ing sak lumahé bumi.

¹⁸Kula pada bakal ngluhurké asma sampéyan nganti turun-temurun, mila kabèh bangsa pada bakal memuji marang sampéyan ing sak terusé lan ing sak lawasé.