Read Caribbean Javanese Masmur 46 Bible Online

Masmur 46 - Caribbean Javanese bible

Masmur 46

¹Kanggo juru penyanyi. Sangka turunané Korah. Kidungé: Wong wadon nom. Kidungan.

²Gusti Allah kuwi dadi panggonan pengayoman lan karosan kita, nyata banget enggoné mitulungi sak njeruhné kangèlan.

³Mulané kita ora bakal giris, senajan bumi nganti ngalih panggonané, lan gunung-gunung pada gonjing ing telengé segara;

⁴senajan ombaké lan banyuné muntuk, lan senajan gunung pada horek awit sangka molak-maliké ombak. Sela

⁵Ana kali sing iliné mbungahké kutané Gusti Allah, omahé sing Mahaluhur.

⁶Gusti Allah ing kono, mulané ora bakal gonjang-ganjing, lan bakal dipitulungi karo Gusti Allah ing wayah ésuk.

⁷Para bangsa pada gègèr, kabèh kraton pada gonjing, Panjenengané ngetokké swarané, bumi nganti ajur mumur.

⁸GUSTI sing ngwasani langit lan bumi nunggal karo kita, Gusti Allahé Yakub kuwi dadi bèntèng kita. Sela

⁹Pada lungaa, sawangen penggawéané GUSTI, sing nganakké pangrusakan ing bumi,

¹⁰sing ngendek peperangan nganti tekan pungkasané bumi, sing nugel gendéwa lan ngentulké tumbak, sing ngobongi kréta perang karo geni.

¹¹“Menenga lan ngertia, yèn Aku iki Gusti Allah! Aku diluhurké ing tengahé para bangsa, diluhurké ing bumi!”

¹²GUSTI sing ngwasani langit lan bumi nunggal karo kita, Gusti Allahé Yakub kuwi bèntèng kita. Sela