Read Caribbean Javanese Masmur 48 Bible Online

Masmur 48 - Caribbean Javanese bible

Masmur 48

¹Kidungan. Masmur turunané Korah.

²GUSTI kuwi Mahaluhur lan banget pinujiné ing kutané Gusti Allah kita!

³Gunungé sing sutyi, sing duwur tur apik, kuwi kanggo kabungahané sak jagat; gunung Sion kuwi pernahé adoh ing sisih lor, kutané Ratu gedé.

⁴Ing kraton-kraton Gusti Allah nduduhké yèn Panjenengané kuwi dadi bèntèng.

⁵Awit kuwi delengen, para ratu pada ngumpul, lan pada bebarengan maju nyerang;

⁶bareng pada weruh kuta kuwi pada delek-delek; kagèt, terus pada mblayu bingung.

⁷Dadakan pada ndredek ing kono, pada lara kaya wong wadon sing arep mbayi nduwé anak.

⁸Panjenengan ngremuki kapal-kapalé Tarsis, karo lésus sangka wétan.

⁹Kaya kita krungu, ya kaya mengkono pandelengé kita, ing kutané GUSTI sing ngwasani langit lan bumi, ing kutané Gusti Allah kita; Gusti Allah sing nguwatké kuwi langgeng selawasé. Sela

¹⁰Duh Gusti Allah, ing griya Panjenengan, kita pada ngéling-élingké kawelasan Panjenengan.

¹¹Duh Gusti Allah, kaya asma Panjenengan, mengkono uga kesuwur Panjenengan, nganti tekan pungkasané bumi, tangan tengen Panjenengan kebak keadilan.

¹²Gunung Sion ya bèn bungah-bungah; para anak wadoné Yéhuda ya bèn surak-surak awit sangka paukuman Panjenengan!

¹³Pada mlakua ngubengi Sion, pada ngubengana sak kemputé, itungen menara-menarané,

¹⁴tamatna témboké, dlajahana kraton-kratoné, supaya kowé pada bisa nyritakké marang anak-putu.

¹⁵Sejatiné iki Gusti Allah, ya Panjenengané kuwi Gusti Allah kita ing sak terusé lan selawasé! Ya Panjenengané kuwi sing nuntun kita.