Read Caribbean Javanese Masmur 49 Bible Online

Masmur 49 - Caribbean Javanese bible

Masmur 49

¹Kanggo juru penyanyi. Sangka turunané Korah. Masmur.

²Hé kabèh para bangsa, pada rungokna, hé kabèh wong ndonya, pada ngrungokna;

³para wong tyilik lan wong gedé, para wong sugih lan wong mlarat sak kabèhé!

⁴Tutukku bakal nglairké kawityaksanan, sing dipikir-pikir karo atiku kuwi pangertèn.

⁵Aku bakal ngrungokké marang bebasan, lan bakal ngomongké paribasan karo ngunèkké siter!

⁶Kenèng apa kok aku nganti wedi marang dinané kangèlan, waktu aku dikepung karo penggawé alané wong sing pada ngoyak-oyak aku,

⁷wong-wong sing pada ngendel-ngendelké banda-bandané, lan umuk awit sangka okèhé bandané?

⁸Ora ana wong siji-sijia waé sing bisa ngluwari sedulur liyané, utawa ngomongi tebusan marang Gusti Allah kanggo gantiné nyawané.

⁹Awit kelarangen regané kanggo ngluwari nyawané, lan selawasé ora bakal tyukup,

¹⁰supaya tetep urip ing sak terusé, lan ora weruh bolongané kuburan.

¹¹Sejatiné, bakal weruh: para wong sing wityaksana pada mati, para wong bodo lan tanpa pikiran pada mati bareng, lan bandané ditinggalké marang wong liyané.

¹²Kuburané kuwi dadi omahé selawasé, dienggoni nganti turun-temurun, tegalan-tegalan dianggep dadi duwèké.

¹³Nanging wong kuwi gedéa kaluhurané, ya ora tetep uripé, mung pada kaya kéwan sing dipatèni.

¹⁴Kaya mengkono kuwi kahanané wong sing pertyaya marang awaké déwé, lan patiné wong sing seneng marang tembungé déwé. Sela

¹⁵Kaya wedus enggoné pada mlebu ing ndonyané wong mati, pati sing dadi pangoné; pada terus mudun ing kuburan, awaké ajur mumur, ndonyané wong mati sing dadi panggonané.

¹⁶Nanging nyawaku bakal diluwari karo Gusti Allah, sangka tyengkeremané ndonyané wong mati, awit Panjenengané bakal njupuk aku. Sela

¹⁷Aja sumelang, yèn ana wong mundak sugih, lan mundak tambah kamulyané ing omahé,

¹⁸awit waktu matiné kabèh kuwi ora bakal digawa, kamulyané ora bakal ngetutké dèwèké.

¹⁹Senajan sak njeruhné uripé ngarani awaké déwé kuwi beja, lan dielem karo wong awit enggoné mbetyiki awaké déwé,

²⁰nanging bakal pada marani para leluhuré, sing ora bakal weruh pepadang sak terusé.

²¹Manungsa sing kanggonan kamulyan okèh, yèn ora nduwé kaweruh, kuwi kena dipadakaké kéwan sing dibelèh.