Read Caribbean Javanese Masmur 50 Bible Online

Masmur 50 - Caribbean Javanese bible

Masmur 50

¹Masmur Asaf. Sing Mahakwasa, ya kuwi GUSTI, ngomong lan nyeluk bumi, sangka njedulé srengéngé tekan peneré mingslepé.

²Sangka Sion, putyuké kabetyikan, Gusti Allah ngétok nganggo kamulyan.

³Gusti Allah kita bakal teka lan ora meneng waé, ing ngarepé ana geni sing ngobong, ing sak ubengé karo lésus sing medèni.

⁴Panjenengané mbengok marang langit ing nduwur, lan marang bumi perlu ngadili marang umaté:

⁵“Para duwèk-Ku pada klumpukna ing ngarep-Ku, sing pada nggawé perjanjian karo Aku karo pasrah kurban sing dibelèh!”

⁶Terus langit ngomongké keadilané, awit Gusti Allah déwé kuwi sing dadi Rèkter. Sela

⁷“Hé umat-Ku, pada rungokna, Aku gelem ngomong, hé Israèl, Aku mréntahké paseksi marang kowé, Aku iki Gusti Allah, Gusti Allahmu!

⁸Aku ora melèhké kowé awit sangka kurbanmu, awit kurbanmu obongan apa ora tansah ing ngarep-Ku?

⁹Aku ora susah njupuk sapi sangka omahmu utawa wedus lanang sangka kandangmu,

¹⁰awit sak rupané kéwan ing alas kuwi duwèk-Ku, semono uga kéwan-kéwan éwon-éwon ing gunung.

¹¹Kabèh manuk ing awang-awang Aku kenal, lan apa sing urip ing ara-ara kuwi ing pangwasa-Ku.

¹²Yèn Aku ngelih, ora usah ngomong marang kowé, awit ndonya sak isiné kabèh kuwi duwèk-Ku.

¹³Apa Aku mangan dagingé sapi lanang, utawa ngombé getihé wedus lanang?

¹⁴Masrahna maturkesuwun kanggo kurban marang Gusti Allah, lan bayaren janjimu marang sing Mahaluhur!

¹⁵Ing dina kangèlan kowé pada nyeluka marang Aku, terus Aku bakal mitulungi kowé lan kowé bakal ngluhurké Aku.” Sela

¹⁶Nanging marang wong duraka Gusti Allah ngomong mengkéné: “Kowé kok kemendel mriksa pernatan-Ku, lan tutukmu kok ngrasani perjanjian-Ku,

¹⁷nanging kowé geting marang pamelèh, lan nyingkur marang tembung-Ku.

¹⁸Yèn kowé weruh maling, kowé terus dadi kantyané, lan kowé selawasé karo wong laku bédang.

¹⁹Tutukmu aja ngomong ala, lan ilatmu kelèt karo goroh.

²⁰Kowé lungguhan nyatur alané sedulurmu, lan anaké ibumu kok pitenah.

²¹Ya kuwi sing kok lakoni; nanging Aku meneng waé; pikirmu Aku iki pada karo kowé; kowé mesti Tak welèhké lan bab iki bakal Tak atung-atungké ing ngarepmu.

²²Hé kowé sing pada nyingkur marang Gusti Allah, pada gatèkna; supaya aja nganti Tak sempal-sempal, lan ora ana sing ngluwari.

²³Sapa sing masrahaké pamuji kanggo kurban, kuwi ngluhurké Aku; sapa sing jujur mlakuné, keslametan pawèhé Gusti Allah bakal Tak duduhké.”