Read Caribbean Javanese Masmur 52 Bible Online

Masmur 52 - Caribbean Javanese bible

Masmur 52

¹Kanggo juru penyanyi. Kidung piwulangé Daved,

²nalika Doèg, wong Edom teka ngomongi Saul, yèn komendan perang Daved wis teka ing omahé imam Akimèlèk.

³Hé pahlawan, kenèng apa kowé kok gemunggung ing bab sing ala, ing ngarepé wong sing sedina-dina ditrésnani karo Gusti Allah?

⁴Kowé ngrantyam-ngrantyam tyilaka, ilatmu kuwi kaya péso tyukur sing wis diungkal, hé wong goroh!

⁵Kowé kuwi seneng marang sing ala ngungkuli kabetyikan, lan marang tembung goroh ngungkuli sing bener. Sela

⁶Sing kok senengi kuwi kabèh tetembungan sing ngrusak, hé ilat sing goroh!

⁷Nanging kowé kuwi ing sak temené bakal dibrukké karo Gusti Allah sak terusé bakal direbut lan digawa sangka tarup bakal dibetot sangka negarané wong urip. Sela

⁸Para wong bener bakal pada weruh lan dadi pada wedi, lan bakal pada nggeguyu, tembungé:

⁹“Lah kaé delengen, wong kuwi ora nganggep Gusti Allah dadi pangungsèné, nanging pertyaya marang kasugihané sing lubèr, lan ndelik marang penggawéné enggoné ngrusak!”

¹⁰Nanging aku iki bakal ing griyané Gusti Allah; kaya wit saitun sing ngrembuyung seger ijuh royo-royo; katrésnané Gusti Allah sing dijagakké selawasé.

¹¹Kula bakal ngunggahké maturkesuwun ing ngarepé Panjenengan tekan sak lawasé, awit sangka pangayoman Panjenengan; awit asma Panjenengan kuwi apik, mila bakal kula kabaraké ing ngarepé para katrésnané Panjenengan!