Read Caribbean Javanese Masmur 55 Bible Online

Masmur 55 - Caribbean Javanese bible

Masmur 55

¹Kanggo juru penyanyi. Diiringi swarané siter. Kidung piwulangé Daved.

²Duh Gusti Allah, Panjenengan supaya gelem ngrungokké pandonga kula, Panjenengan aja nganti ndelik sangka penjaluk kula!

³Panjenengan supaya gelem ngrungokké lan gelem nyauri, kula nglembara karo nangis awit sangka semplak.

⁴Awit sangka bengokané mungsuh, lan panindesé wong duraka; awit pada nekakké tyilaka, lan karo nggeget-nggeget anggèné nglawan kula.

⁵Ati kula ngolang-ngaling, lan wediné pati ngebruki kula.

⁶Kula katekan rasa wedi lan rasa gemeter, kula dikwasani karo rasa wedi.

⁷Kula pikir mengkéné: “Oh, yèn aku dikèki swiwi kaya manuk dara, terus mabur golèk panggonan sing tentrem,

⁸malah terus mlayu nganti adoh, lan nginep ing ara-ara samun. Sela

⁹Aku bakal gelis-gelis golèk panggonan pangungsèn, ngéndani angin gedé lan lésus.”

¹⁰Duh Gusti, supaya Panjenengan gelem nggawé bingungé wong-wong kuwi lan késruhké rembukané, awit kula weruh penggawé ala lan bantahan ing kuta!

¹¹Awan wengi pada ngubengi kuta kuwi ing sak nduwuré témboké, lan ing njeruh ana tyilaka lan kasangsaran;

¹²lan kahanané sing ngrusak ditemokké ing pangwasané, penindes lan para wong goroh njedul tanpa mandek ing lemah rata.

¹³Yèn mungsuh kula sing ngèlèk-èlèkké kula, kula ijik bisa sabar. Yèn sing sengit marang kula sing nyombongaké urip ing ngarep kula, kula ijik bisa ndelik.

¹⁴Nanging kowé kuwi wong sing tyedak karo aku, kantyaku lan wong sing tak pertyaya.

¹⁵Aku pada sesrawungan karo betyik, lan pada bebarengan munggah menyang griyané Gusti Allah ing sak tengahé keraméan.

¹⁶Wong kuwi supaya pada ketyekel karo pati, pada muduna menyang ndonyané wong mati urip-uripan! Awit omahé malah batiné kanggonan sing ala.

¹⁷Nanging aku nyebut marang Gusti Allah, lan GUSTI terus bakal ngluwari aku.

¹⁸Ing wayah soré, ésuk lan awan aku sambat lan nangis; Gusti terus ngrungokké swaraku.

¹⁹Gusti Allah ngluwari aku karo tentrem sangka serangané mungsuhku, awit pada gembruduk nglawan aku.

²⁰Gusti Allah sing njagong ing damparé wiwit mbiyèn mula, bakal krungu lan ngasorké wong-wong kuwi. Sela Awit pada ajek waé, lan pada ora wedi marang Gusti Allah.

²¹Wong kuwi ngagakké tangané marang para wong sing urip rukun bebarengan karo dèwèké, awit nerak perjanjiané.

²²Lunyuné tyangkemé ngungkuli mertégo, nanging karepé arep nyerang; tembungé alusé ngungkuli lenga, nanging sak kabèhé mau pedang sing landep.

²³Sumelangmu pasrahna marang GUSTI, mesti kowé dirumati! Gusti ora nglilani, yèn wong bener gloyoran ing selawasé.

²⁴Nanging Panjenengan, duh Gusti Allah, bakal nyemplungké wong-wong kuwi ing sumur sing jeru; wong sing ngutahké getih lan mlaku goroh, umuré ora bakal teka separo nanging kula pertyaya marang Panjenengan.