Read Caribbean Javanese Masmur 57 Bible Online

Masmur 57 - Caribbean Javanese bible

Masmur 57

¹Kanggo juru penyanyi. Miturut nyanyian: Aja ngrusak. Miktam, masmuré Daved, waktu mblayu sangka ngarepé Saul menyang guwa.

²Kula supaya Panjenengan welasi, duh Gusti Allah, kula supaya Panjenengan welasi, awit mung Panjenengan sing dadi pangayomané nyawa kula; kula ndelik ing ngisoré swiwi Panjenengan, nganti bebaya kuwi wis lunga.

³Aku sambat marang Gusti Allah sing Mahaluhur, Gusti Allah ngrampungké perkaraku.

⁴Gusti Allah supaya gelem kongkonan sangka swarga ngluwari aku, lan ngisin-isinké wong sing ngidak-idak aku. Sela Gusti Allah supaya gelem ngirimké kawelasan lan kebenerané.

⁵Aku ngglétak ing tengah-tengahé singa-singa, sing seneng nubruk anak-anaké manungsa, sing untuné kaya tumbak lan panah, lan sing ilaté kaya pedang landepé.

⁶Duh Gusti Allah, Panjenengan supaya gelem nduduhké kaluhuran Panjenengan, nganti teka ing sak nduwuré langit, lan kamulyan Panjenengan supaya ngliwati sak lumahé bumi.

⁷Mlakuku pada dipasangi kala-jiret, nyawaku didingklukké, pada ngeduk juglangan ing ngarepku, nanging terus pada ketyemplung déwé ing kono. Sela

⁸Ati kula wis tata-tata, duh Gusti Allah, ati kula wis tata-tata, kula bakal ngidung, kula bakal ngidung masmur.

⁹Hé nyawaku, tangia, tangia, hé harep lan siter, aku arep nggugah ésuk wétan!

¹⁰Panjenengan bakal kula puji ing sak tengahé para bangsa, duh Gusti, Panjenengan bakal kula kidungké masmur ing sak tengahé para taleré bangsa.

¹¹Awit kawelasan Panjenengan luhuré sundul langit, lan kebeneran Panjenengan sundul mendung.

¹²Duh Gusti Allah, Panjenengan supaya gelem ngétokké kaluhuran Panjenengan nganti teka ing sak nduwuré langit, lan kamulyan Panjenengan supaya ngliwati sak lumahé bumi.