Read Caribbean Javanese Masmur 58 Bible Online

Masmur 58 - Caribbean Javanese bible

Masmur 58

¹Kanggo juru penyanyi. Pamujiné kaya kidung: Aja ngrusak. Miktam, masmuré Daved.

²Hé para sing nyekel pangwasa, apa putusanmu kuwi adil tenan? Enggonmu ngadili para anak-anaké manungsa kuwi apa jujur?

³Malah tyotyok karo karepmu kowé nglakoni sing ala, tanganmu nindakké pilara ing bumi.

⁴Wong duraka pada murtad wiwit lairé, para tukang ngapus kuwi pada nyasar wiwit ing wetengé ibuné.

⁵Ratyuné kaya ratyuné ula, pada kaya ula upas sing budek, sing nutupi kupingé,

⁶sing ora ngrungokké marang swarané para tukang njapani, utawa swarané tukang matya mantra sing pinter.

⁷Duh Gusti Allah, Panjenengan supaya gelem nggrompali untuné tutuké, lan gelem mrotoli siungé singa enom. Sela

⁸Pada tumpesa kaya banyu sing mili terus entèk, ya bèn pada alum kaya suket ing dalan.

⁹Ya bèn pada entèk kaya bekètyot sing dadi ilu, pada kaya bayiné wong wadon sing lair kluron sing ora weruh srengéngé.

¹⁰Sak durungé wajan-wajanmu kena geniné eri, kabèh sing ijik seger uga sing wis alum pada kobong karo Gusti.

¹¹Wong bener bakal pada bungah-bungah awit weruh balesan, lan bakal ngisuhi sikilé karo getihé wong duraka.

¹²Lan wong bakal pada ngomong: “Wong bener kuwi nyata nampa upahé, sak temené mung Gusti Allah sing ngekèki keadilan ing bumi.”