Read Caribbean Javanese Masmur 59 Bible Online

Masmur 59 - Caribbean Javanese bible

Masmur 59

¹Kanggo juru penyanyi. Miturut nyanyian: Aja ngrusak. Miktam, masmuré Daved, waktu Saul kongkonan ndingkik lan matèni ing omahé.

²Duh Gusti Allah kula, kula supaya Panjenengan owalké sangka mungsuh kula, Panjenengan supaya gelem mbèntèngi kula marang sing pada nglawan kula.

³Kula supaya diowalaké sangka wong sing pada nggawé ala, slametna sangka wong sing pada seneng ngutahké getih.

⁴Awit wong kuwi tenan pada nyegat arep njabut nyawa kula, wong rosa-rosa pada nyerang kula, nanging kula ora nindakké sing kliru, kula ora dosa, duh GUSTI,

⁵kula ora nduwé kesalahan, kok pada mlayu lan arep ngenèng aku. Panjenengan supaya gelem nekani kula lan gelem weruh!

⁶Duh GUSTI, Gusti Allahé sing ngwasani langit lan bumi, Panjenengan kuwi Gusti Allahé Israèl. Panjenengan supaya gelem tangi ngekèki paukuman marang para bangsa; para wong sing pada nandangi ala lan nindakké ngiyanati kuwi aja nganti Panjenengan welasi! Sela

⁷Saben mbengi pada mbalik menèh, pada njegok kaya asu lan ngubengi kuta.

⁸Tenan, pada nyemoni karo tutuké; ngolok-olok manggon ing lambéné, awit - sapa sing ngrungokké?

⁹Nanging wong kuwi pada Panjenengan guyu, duh GUSTI, kabèh bangsa pada Panjenengan poyoki.

¹⁰Duh kekuwatan kula, Panjenengan sing kula gondèli, awit Gusti Allah dadi kuta bèntèng kula.

¹¹Gusti Allahku bakal metuk aku karo katrésnan-Né; Gusti Allah bakal ndadèkké aku bisa nyepèlèkké para mungsuhku.

¹²Supaya aja nganti pada Panjenengan patèni, supaya bangsa kula ora lali, supaya Panjenengan nggawé pada kelunta-lunta karo pangwasa Panjenengan, supaya pada Panjenengan ambruké, duh Gusti, tamèng kula.

¹³Tembungé lambéné kuwi dosané tutuké, pada kejireta awit sangka sombongé. Awit ipat-ipat lan goroh sing dityritakké.

¹⁴Supaya pada dientèkké karo bebendu, dientèkké nganti pada entèk-resik, supaya pada ngerti, yèn Gusti Allah sing ngwasani tyedak turunané Yakub, nganti teka ing pungkasané bumi. Sela

¹⁵Saben wantyi mbengi pada teka menèh, njegok kaya asu lan ngubengi kuta.

¹⁶Pada nglembara nggolèki pangan, yèn ora warek, terus pada nggereng.

¹⁷Nanging kula bakal ngidungké kekuwatan Panjenengan, ing wantyi ésuk kula bakal surak-surak awit sangka kawelasan Panjenengan; awit Panjenengan kuwi wis dadi kuta bèntèng kula, panggonan pangungsèn kula ing njeruhné kangèlan kula.

¹⁸Duh karosan kula, Panjenengan bakal kula kidungaké karo kidung masmur; awit Gusti Allah kuwi dadi kuta bèntèng kula, Gusti Allah kula sing kebak katrésnan.