Read Caribbean Javanese Masmur 63 Bible Online

Masmur 63 - Caribbean Javanese bible

Masmur 63

¹Masmuré Daved, waktu ing ara-ara samun Yéhuda.

²Duh Gusti Allah, Panjenengan kuwi Gusti Allah kula, kula nggolèki Panjenengan, nyawa kula ngelak marang Panjenengan; daging kula kangen marang Panjenengan; kaya lemah sing garing lan gundul, kesatan banyu.

³Kaya mengkono enggèn kula ndangak marang Panjenengan ing panggonan sutyi, karo nyawang marang karosan lan kamulyan Panjenengan.

⁴Awit kawelasan Panjenengan luwih apik tenimbangané urip; lambé kula bakal memuji asma Panjenengan.

⁵Ya mengkono kuwi enggèn kula bakal ngluhurké Panjenengan sak lawasé kula urip, ngumbulké tangan kula awit sangka asma Panjenengan.

⁶Nyawa kula kaya warek karo gajih lan sungsum, karo lambé sing surak-surak tutuk kula masrahké pamuji.

⁷Yèn kula ing ambèn kèlingan marang Panjenengan, sewengi muput enggèn kula nggagas marang Panjenengan,

⁸sakjané Panjenengan wis dadi pitulungan kula, lan kula bisa surak-surak ing ngisoré swiwi Panjenengan.

⁹Nyawa kula rumaket marang Panjenengan, lan tangan tengen Panjenengan nyekel kula.

¹⁰Nanging wong sing pada arep njabut nyawa kula, pada tiba ing telengé bumi;

¹¹pada bakal dipasrahké ing pangwasané pedang lan bakal dadi pangané asu alasan.

¹²Nanging ratu bakal sukak-sukak, awit sangka Gusti Allah; sapa waé wong sing sumpah ing asmané Gusti Allah, bakal nggunggung asmané Gusti, awit kabèh wong goroh pada kebungkem tutuké.