Read Caribbean Javanese Masmur 66 Bible Online

Masmur 66 - Caribbean Javanese bible

Masmur 66

¹Kanggo juru penyanyi. Kidung masmur. Hé sak lumahé bumi, surak-suraka kanggo Gusti Allah!

²Kamulyané asmané pada kidungna, Panjenengané luhurna karo pamuji!

³Ngomonga marang Gusti Allah: “Tenan anggèné ngidap-idapi kabèh penggawéané Panjenengan kuwi; awit sangka gedéné pangwasané Panjenengan, mungsuh Panjenengan nganti pada teluk, njaluk dimelasi marang Panjenengan.

⁴Sak jagat kabèh sujut nyembah marang Panjenengan, lan pada ngidungké masmur ngadep ing ngarepé Panjenengan, lan ngidungké masmur asma Panjenengan.” Sela

⁵Pada majua, delengen penggawéané Gusti Allah; ngidap-idapi sing ditindakké marang manungsa.

⁶Segara diwalik dadi daratan, wong pada mlaku ing daratan nyabrang kali. Awit sangka kuwi kita pada bungah awit sangka Panjenengané,

⁷sing mréntah karo kuwat selawasé, sing ngawasi para bangsa karo mripaté. Wong sing pada nglawan ora bisa gemunggung. Sela

⁸Para bangsa, pada pasrahna pamuji marang Gusti Allah kita lan pada pasraha pamuji marang Panjenengané!

⁹Panjenengané sing nguripi nyawa kita lan ora nglilani yèn sikil kita pada gloyoran.

¹⁰Awit Panjenengan wis ndadar kita, duh Gusti Allah, Panjenengan ndadar kita kaya murnèkké slaka.

¹¹Panjenengan wis nggawa kita mlebu ing jaring; lan geger kita Panjenengan tumpangi momotan.

¹²Panjenengan ngejarké waé wong-wong sing pada ngidak-idak sirah kita, kita wis mlebu ing geni lan ing banyu; nanging saiki Panjenengan wis tokké kita sak nalika terus luwar.

¹³Kula bakal teka mlebu ing griya Panjenengan masrahké kurban obongan, lan ngluwari janji kula ngadep marang Panjenengan,

¹⁴ya kuwi janji sing metu sangka lambé kula, lan diomongké tutuk kula, waktu kula ngalami susah.

¹⁵Kurban-kurban obongan rupa kéwan lemu sing bakal kula pasrahké marang Panjenengan, karo kemebulé kurban wedus-wedusé lanang; kula bakal masrahaké sapi uga wedus lanang. Sela

¹⁶Hé kowé kabèh sing pada ngabekti marang Gusti Allah pada rungokna, aku arep nyritakké apa sing ditindakké Gusti marang aku.

¹⁷Aku wis sambat marang Panjenengané karo tutukku, saiki aku ngidungké pamuji karo ilatku.

¹⁸Yèn ing atiku ana angen-angené sing ala, Gusti mesti ora gelem ngrungokké.

¹⁹Nanging nyatané Gusti Allah wis ngrungokké, lan wis nggatèkké pandongaku sing tak utyapké.

²⁰Pinujia Gusti Allah, sing ora nampik pandongaku lan ora mandek katrésnané marang aku.