Read Caribbean Javanese Masmur 69 Bible Online

Masmur 69 - Caribbean Javanese bible

Masmur 69

¹Kanggo juru penyanyi. Miturut nyanyian: Kembang bakung. Sangka Daved.

²Duh Gusti Allah, kula supaya Panjenengan tulungi, awit banyuné wis munggah tekan gulu kula.

³Kula kelep ing rawa sing jeru, ora ana panggonan kanggo pantyatan; kula wis kelep ing banyu sing jeru, ombak gedé ngéntérké kula.

⁴Kula semplak awit sangka enggèn kula sambat, telak kula garing; mripat kula pedes awit sangka enggèn kula ngentèn-entèni marang Gusti Allah kula.

⁵Wong sing nyengiti kula tanpa sebab kliwat okèh tenimbang rambut kula, okèh banget tyatyahé wong sing ngupaya bakal ngrusak kula, sing nyatur kula tanpa sebab; kula dipeksa ngijoli barang sing ora kula rayah.

⁶Duh Gusti Allah, Panjenengan ngerti tegesé kabodoané kula, kesalahan-kesalahan kula ora ketutup kanggo Panjenengan.

⁷Duh GUSTI, Gusti Allahé sing ngwasani langit lan bumi, para wong sing njagakké marang Panjenengan, supaya aja nganti ngalami kisinan awit sangka kula. Duh Gusti Allahé Israèl, wong sing nggolèki Panjenengan, aja nganti dadi tyatyatan awit sangka kula.

⁸Awit sangka Panjenengan, kula nampani disepèlèkké, praupan kula kebak tyatyat.

⁹Kula diemohi sedulur-sedulur kula, anak-anaké emak kula pada nganggep kula wong liya,

¹⁰awit enggèn kula nyenengi griya Panjenengan kuwi nggosongké kula, lan tembung-tembung nyatyat marang Panjenengan wis natoni kula.

¹¹Kula nangis ing waktu kula pasa, nanging kuwi dadi tyatyat kanggo kula;

¹²kula nganggo salin kasusahan, terus dadi omongané.

¹³Kula tansah dadi omongané wong-wong sing pada lungguh ing lawangé gapura, kula dinyanyèkké karo wong sing pada seneng ngombé ombèn sing nggawé mendem.

¹⁴Nanging kula, kula ndedonga marang Panjenengan, duh GUSTI, ing waktu Panjenengan seneng ing ati, duh Gusti Allah; kanggo kawelasan Panjenengan sing gedé, Panjenengan supaya gelem nyauri kula, karo pitulungan Panjenengan sing setia!

¹⁵Kula supaya Panjenengan etokké sangka endutan, aja nganti kelep, kula supaya dislametké sangka wong-wong sing pada sengit marang kula, lan sangka banyu sing jeru.

¹⁶Ombaké banyu aja nganti ngéntérké kula, aja nganti kula entèk ing teleng, lan sumur aja nganti nutupi kula.

¹⁷Duh GUSTI, Panjenengan supaya gelem nyauri kula, awit kawelasan Panjenengan kuwi gedé, Panjenengan supaya gelem weruh kula sak pantesé karo kawelasan Panjenengan sing gedé.

¹⁸Aja nganti ndelikké praupan Panjenengan sangka abdi Panjenengan, awit kula kangèlan; supaya gelis gelem nyauri marang kula!

¹⁹Supaya gelem nekani kula lan nebus kula. Kula supaya Panjenengan tulungi awit sangka satru-satru kula.

²⁰Panjenengan ndelok tyatyat kula, kewirangan kula lan reget kula. Panjenengan weruh mungsuh kula.

²¹Ati kula remuk awit sangka tembung nyawiahé, sempal pengarep-arep kula; kula ngarep-arep kawelasan, nanging tanpa guna, lan ngarep-arep panglipuran, nanging ora nemokké.

²²Malah kula dikon mangan ratyun, lan waktu kula ngelak, dikèki tyukak.

²³Kembulané wong-wong kuwi dadia jiret ing ngarepé, lan slametané dadia jiret.

²⁴Mripaté pada dadia peteng, nganti ora bisa weruh; lan bangkèkané dadia lemes!

²⁵Panjenengan supaya gelem ngebyuki wong-wong kuwi karo bebendu, lan ketiban karo mulat-mulat nesu Panjenengan.

²⁶Tarupé dadia suwung, tarup-tarupé aja nganti ana sing ngenggoni.

²⁷Awit pada nyia-nyia wong sing Panjenengan gebuki, pada nambahi larané wong sing pada Panjenengan tatoni.

²⁸Dosané wong-wong kuwi supaya Panjenengan tambahi, aja nganti pada olèh kabeneran ing ngarepé Panjenengan!

²⁹Supaya dityorèt sangka bukuné urip, aja nganti ketyatet nunggal karo wong sing sampurna!

³⁰Nanging kula kuwi ditindes lan disengsarakké, duh Gusti Allah, keslametan pawèh Panjenengan supaya ngayomi kula!

³¹Asmané Gusti Allah bakal tak puji karo kidungan, lan Panjenengané tak luhurké karo kidung maturkesuwun.

³²Ing ngarepé Gusti Allah kuwi luwih betyik tenimbang sapi lanang, ngungkuli sapi lanang sing wis ana sunguné lan tratyaké petyah.

³³Delengen, hé wong sing andap asor lan pada bungah-bungaha, hé wong sing pada nggolèki Gusti Allah, bèn atimu seneng menèh!

³⁴Awit GUSTI ngrungokké wong sing mlarat, lan ora nyepèlèkké umaté sing dadi ukuman.

³⁵Panjenengané supaya diluhurna karo langit lan bumi, lan segara uga sing gembrégah ing njeruhné.

³⁶Awit Gusti Allah bakal mitulungi Sion, lan mbangun kuta-kuta ing Yéhuda, supaya dienggoni para umaté lan dadia duwèké.

³⁷Para anak putuné abdiné bakal pada nampa warisan kuwi, lan wong sing trésna marang asmané bakal pada manggon ing kono.