Read Caribbean Javanese Masmur 7 Bible Online

Masmur 7 - Caribbean Javanese bible

Masmur 7

¹Kidung sambaté Daved, sing dikidungké ngadep marang GUSTI, awit sangka tembungé Kus, wong Bényamin.

²Duh GUSTI, Gusti Allah kula, kula nggolèk pengayoman ing Panjenengan. Kula luwarana sangka kabèh wong sing nguyak-uyak kula, awit Panjenengan nulungi kula.

³Yèn ora, mesti ditubruk kaya singa, lan nyèrèt kula lan ora ana sing ngutyuli.

⁴Duh GUSTI, Gusti Allah kula, yèn kula nandangi siji waé sing ora bener, yèn tangan kula nindakké sing ora éklas,

⁵yèn kula mbales ala marang sing betyik, utawa ngrampok satru kula tanpa sebab,

⁶yèn mengkono, bèn kula diuber karo mungsuh nganti ketyekel, terus urip kula diidak-idak ing lemah, lan kaluhuran kula dipendema ing lebu. Sela

⁷Duh GUSTI, ngadeka, ing njeruhné nesu-Mu, Duh Gusti, tangia nglawan nesuné mungsuhku, Duh Gusti, tangia mitulungi kula, Panjenengan, sing mréntahké pengadilan.

⁸Kumpulké para penggedéné bangsa pada ngubengi Panjenengan, Panjenengan terus gelem njagong ing dampar-Mu sak nduwuré dèkné.

⁹GUSTI ngadili para bangsa. Duh GUSTI, supaya Panjenengan mutusi kanggo beneré kula, awit kula bener lan resik.

¹⁰Pungkasana alané wong ala, nanging dikuwatké wong bener. Panjenengan sing njajal ati lan batiné manungsa, duh Gusti Allah, sing adil.

¹¹Gusti Allah kuwi tamèngku, sing mitulungi wong sing jujur ing atiné.

¹²Gusti Allah kuwi Rèkter sing adil, lan Gusti Allah ngétokké nesu-Né saben dina marang ala.

¹³Yèn wong ora mratobat, Gusti Allah bakal ngasah pedangé,[3] mentèng gendéwané lan panahé ditujukké.

¹⁴Gaman ngidap-idapi dityawiské kanggo wong kuwi, panahé diurupké.

¹⁵Wong kuwi meteng sing ala lan meteng tyilaka terus nglairké goroh;

¹⁶terus nggawé juglangan, diduduk, nanging ketyemplung ing juglangan gawéané déwé.

¹⁷Sing ala sing ditindakké mau mbalik nampek batuké déwé, lan panganiayané medun nibani endasé déwé.

¹⁸Aku arep maturkesuwun marang GUSTI awit sangka keadilané, lan ngidungké masmur kanggo asmané GUSTI, sing Mahaluhur.