Read Caribbean Javanese Masmur 72 Bible Online

Masmur 72 - Caribbean Javanese bible

Masmur 72

¹Sangka Salomo. Duh Gusti Allah, supaya Panjenengan ngekèki pernatan Panjenengan marang ratu, lan keadilan Panjenengan marang anaké ratu!

²Bisaa Panjenengané ngwasani para umat Panjenengan karo adil, lan para sing ditindes, karo pernatan!

³Gunung-gunung pada ngetokké katentreman marang bangsa, lan puntuk-puntuk ngolèhna kabeneran!

⁴Panjenengané supaya gelem ngekèki keadilan marang para wong sing ditindes, karo bangsa kuwi, para wong mlarat pada tulungana, nanging sing nindes supaya pada diremukna!

⁵Supaya umuré didawakké sak lawasé ana srengéngé, nganti turun-temurun, sak lawasé ana mbulan!

⁶Panjenengané supaya kaya udan sing tiba ing ara-ara sesuketan, lan kaya deresé udan sing nyiramké bumi!

⁷Ing jamané keadilan supaya bisa mekar, lan tentrem rahayu bisaa lubèr, nganti mbulan wis ora ana menèh.

⁸Panjenengané supaya nggawa pangwasa wiwit sangka segara tekané segara, lan sangka kali Efrat nganti tekané ing pungkasané bumi.

⁹Para sing manggon ing ara-ara samun pada sujuta ing ngarepé, lan para mungsuh-mungsuhé pada ndilata lebu;

¹⁰para ratu ing Tarsis karo ing puluh-puluh pada masrahna pisungsung, para ratu ing Syéba lan ing Séba pada nggawaa pajek!

¹¹Kabèh para ratu supaya pada sujut lan nyembah marang Panjenengané, lan kabèh bangsa pada dadia abdiné!

¹²Awit Panjenengané bakal ngluwari para wong mlarat sing pada sambat njaluk tulung, wong sing ditindes, lan wong sing ora ana sing mitulungi;

¹³Panjenengané bakal ngéman marang wong sing ringkih lan wong mlarat, bakal ngentasaké nyawané wong mlarat.

¹⁴Panjenengané bakal nebus nyawané sangka penindes lan penggawé ala, getihé dianggep larang ing ngarepé.

¹⁵Supaya slamet kanggo ratu! Supaya pasrahana pisungsung emas teka negara Syéba! Supaya tansah didongakké, lan ing saben dina supaya dikèkana berkah!

¹⁶Negara supaya kalubèrana tanduran gandum, sing kétok ngombak-ombak ing putyuké pegunungan; woh-wohé ya bèn mekar kaya ing Libanon, gagang-gagangé pada mekar kaya suket ing bumi.

¹⁷Asmané lestaria sak lawasé, sak lawasé ana srengéngé asmané supaya mundak kesuwur. Kabèh bangsa supaya pada berkah-berkahan karo asmané, lan nyebut piyambaké rahayu.

¹⁸Pinujia GUSTI, Gusti Allahé Israèl, Panjenengané sing nindakké mujijat Panjenengané!

¹⁹Lan pinujia asmané sing mulya sak lawas-lawasé, sak lumahé bumi kebaka karo kaluhurané. Amin, Amin.

²⁰Tekan seméné pandongané Daved, anaké Isai.