Read Caribbean Javanese Masmur 73 Bible Online

Masmur 73 - Caribbean Javanese bible

Masmur 73

¹Masmuré Asaf. Sak temené Gusti Allah kuwi apik marang para wong sing tulus atiné, lan sing resik atiné.

²Nanging aku, kurang setitik waé sikilku keplèsèt, aku mèh waé keplèsèt.

³Awit mèri atiku karo para wong sing gemunggung, yèn aku weruh kabekjané wong duraka.

⁴Awit kuwi ora pada ngalami lara, awaké waras lan lemu;

⁵ora pada ngrasakaké kasusahané manungsa, lan ora pada kena ing bebendu kaya wong liyané.

⁶Mulané pada kalungan kesombongan, lan sandangané rupa penggawé ala.

⁷Awit sangka lemuné, kesalahané kétok wéla-wéla, atiné mbludak karo pendakwa.

⁸Pada nyemoni lan ngomong karo tyara sing ala, bab penggawé ala pada dirembuk karo gemunggung.

⁹Pada mangapké tutuké nglawan langit, lan ilaté ngumukké awaké déwé ing bumi.

¹⁰Awit sangka kuwi wong pada bali marani dèwèké kabèh, kétoké kaya banyu sing mubal-mubal.

¹¹Lan semauré: “Kepriyé Gusti Allah enggoné ngerti bab kuwi, apa sing Mahaluhur kuwi nduwèni kaweruh?”

¹²Lah kaya mengkono kuwi kahanané para wong duraka: pada golèk mundaké bandané lan seneng-seneng selawasé!

¹³Apa ora tanpa guna enggonku njaga resiké atiku, lan enggonku ngisuhi tangan, kanggo tanda tanpa salah.

¹⁴Nanging sedina muput enggonku kena karo bebendu, lan saben ésuk ora sepi karo paukuman.

¹⁵Yèn aku omongan: “Aku arep ngomong mengkono,” dadi aku sakjané goroh marang turunané para anaké Gusti.

¹⁶Nanging bareng aku nduwé karep arep weruh, bab kuwi kétok angèl ing mripatku,

¹⁷nganti aku mlebu menyang panggonan sutyiné Gusti Allah, terus nggatèkké pungkasané para wong mau.

¹⁸Wong kuwi pada Panjenengan papanaké ing panggonan sing lunyu, terus Panjenengan tibakké nganti remuk.

¹⁹Tenan nyata entèkké mung sak kedèpé mripat waé, pada entèk, resik awit sangka sing ngidap-idapi.

²⁰Pada kaya impèné wong tangi turu, duh Gusti, waktu tangi, rupané Panjenengan sawang asor.

²¹Waktu atiku banget susah, lan ginjelku rasané kaya disuwèk-suwèk,

²²kula rumangsa bodo kula ora ngerti, kaya kéwan-kéwan ing ngarepé Panjenengan.

²³Nanging kula tetep urip tyedak karo Panjenengan; Panjenengan nuntun tangan tengen kula.

²⁴Awit sangka pitutur Panjenengan, Panjenengan nuntun kula, lan ing pungkasané Panjenengan ngangkat kula ing kamulyan.

²⁵Ing swarga kula nduwèni sapa menèh kejaba Gusti? Ing bumi kula ora mélik apa-apa kejaba mung Gusti.

²⁶Senajan daging lan atiku entèk, resik, sak lawasé tetep Gusti Allah sing dadi gunung watuku lan panduman kula.

²⁷Awit sejatiné sapa sing adoh karo Gusti, kuwi pada bakal tiba ing karusakan; kabèh wong sing mlaku bédang karo ninggalké Gusti wong kuwi mesti Gusti entèkké.

²⁸Nanging kula, kula seneng tyedak karo Gusti Allah; Gusti Allah sing kula anggep dadi pengayoman kula, supaya kula bisa tyerita kabèh penggawéané.