Read Caribbean Javanese Masmur 74 Bible Online

Masmur 74 - Caribbean Javanese bible

Masmur 74

¹Kidung piwulang masmuré Asaf. Duh Gusti Allah, kenèng apa sebabé Panjenengan ngguwak kita sak lawasé? Kenèng apa sebabé bebendu Panjenengan sing mulat-mulat nekani wedus ingon-ingonané Gusti?

²Panjenengan supaya gelem éling umat Panjenengan sing wis Panjenengan jikuk wiwit waktu mbiyèn, sing Panjenengan tebus dadi bangsa duwèké Panjenengan piyambak, lan supaya gelem éling marang gunung Sion kraton Panjenengan!

³Panjenengan supaya gelem teka ing panggonan sing sak terusé rusak; sak kabèhé wis dientèkké karo mungsuh ing griya sutyi.

⁴Satru Panjenengan pada njenggong ing griya pamuji Panjenengan, lan wis ngedekké gendérané digawé tenger.

⁵Kétoké kaya wong sing ngangkat kampak nganti duwur, diempakké marang kayu sing ketel,

⁶lan saiki ukir-ukirané pada ditibani karo kampak lan bérang kabèh;

⁷griya Panjenengan sing sutyi diobong, lan panggonan griyané asma Panjenengan dinajiské nganti tekan ing lemah;

⁸pikirané atiné mengkéné: “Apiké pada tak entèkké kabèh waé!” Terus griya pamuji ing sak kabèhé negara diobong kabèh.

⁹Tanda kita ora ana sing kétok, nabi ya wis ora ana menèh, lan sedulur kita ora ana sing ngerti bakal nganti sak pira suwéné menèh.

¹⁰Duh Gusti Allah, bakal nganti sak pira suwéné anggèné satru kuwi nyepatani, lan mungsuh anggèné ngèlèk-èlèkké asma Panjenengan tanpa mandek kuwi?

¹¹Kenèng apa Panjenengan nggèrèt mbalik tangan Panjenengan, lan numpangké tangan Panjenengan sing tengen ing dada?

¹²Nanging Panjenengan, duh Gusti Allah, dadi Ratu kula wiwit jaman mbiyèn mula, sing ngekèki keslametan ing bumi.

¹³Ya Panjenengan kuwi sing mbukak segara karo kekuwatan Panjenengan, sing ngremuki endasé ula naga ing sak nduwuré banyu.

¹⁴Panjenengan sing ngremuki endasé para Léwiatan, Panjenengan pakakké marang kéwan galak ing ara-ara samun.

¹⁵Panjenengan sing metyah sumber lan kali; Panjenengan sing ngesatké kali-kali sing ajek mili.

¹⁶Awan kuwi duwèké Panjenengan, wengi kuwi uga duwèké Panjenengan, Panjenengan sing mernahké pepadang lan srengéngé.

¹⁷Panjenengan sing netepké watesé bumi kabèh, waktu ketiga karo waktu rendeng Panjenengan sing nganakké.

¹⁸Panjenengan supaya gelem éling kuwi: mungsuh nyepèlèkké, duh GUSTI, bangsa sing keblinger kuwi ngèlèk-èlèkké asma Panjenengan.

¹⁹Nyawané manuk dara Panjenengan aja nganti Panjenengan pakakké marang kéwan galak; Panjenengan supaya aja nganti terus-terus lali marang nyawané para wong duwèké Panjenengan, sing ditindes!

²⁰Panjenengan supaya éling marang perjanjian Panjenengan, awit panggonané sing peteng ing bumi kuwi kebak susuh penggawé ala.

²¹Wong sing disiya-siya aja nganti mulih karo kisinan. Wong sing kasangsaran lan wong sing mlarat supaya pada ngelem-elem asma Panjenengan.

²²Duh Gusti Allah, Panjenengan supaya gelem ngadek lan nindakké pengadilan Panjenengan! Supaya gelem éling marang wong sing nyepèlèkké para wong sing keblinger marang Panjenengan sedina muput kuwi.

²³Panjenengan supaya aja nganti lali marang swarané satru Panjenengan, lan mbengok-mbengoké wong sing pada nglawan marang Panjenengan, Tanpa mandek, malah mundak banter mbengoké kuwi.