Read Caribbean Javanese Masmur 75 Bible Online

Masmur 75 - Caribbean Javanese bible

Masmur 75

¹Kanggo juru penyanyi. Miturut nyanyian: Aja ngrusak. Masmuré Asaf. Kidungan.

²Kita pada ngidungké maturkesuwun marang Panjenengan, duh Gusti Allah, kita pada ngidungké maturkesuwun, wong-wong sing nyebut asma Panjenengan pada tyerita mujijat penggawéané Panjenengan.

³“Yèn Aku netepaké waktuné, Aku déwé sing bakal ngadili karo sing bener.

⁴Bumi lan kabèh wong sak isiné pada lebur; Aku, ya Aku déwé sing njejekké tyagak-tyagaké.” Sela

⁵Aku ngomong marang para wong gemunggung: “Kowé aja pada gemunggung.” Lan marang para wong duraka: “Kowé aja pada masang sungu!

⁶Aja pada masang sungumu nganti duwur, lan aja ngomong karo sombong!”

⁷Awit kamulyan kuwi tekané ora sangka wétan utawa sangka kulon, lan ya ora sangka ara-ara samun,

⁸nanging Gusti Allah kuwi sing dadi Rèkter: nglorot wong sing siji lan ngangkat sijiné.

⁹Tangané GUSTI nyekel tuwung isi anggur sing muntuk, kebak tyampuran bumbu; Panjenengané terus ngiling sangka kono; lah ampasé bakal disruput lan diombé karo kabèh wong duraka ing bumi.

¹⁰Nanging aku bakal surak-surak ing sak lawas-lawasé, Gusti Allahé Yakub bakal tak puji karo masmur.

¹¹Kabèh sunguné para wong duraka bakal diremuk, nanging sunguné wong bener kuwi bakal pada diduwurké.