Read Caribbean Javanese Masmur 78 Bible Online

Masmur 78 - Caribbean Javanese bible

Masmur 78

¹Kidung piwulang Asaf. Duh bangsaku, piwulangku pada rungokna, tembungé tutukku pada rungokna.

²Aku arep mbukak tutukku nggelarké bebasan, aku arep ngutyapké bedèkan jaman mbiyèn,

³Apa sing wis pada kita krungu lan kita weruh, lan sing dityeritakké karo para leluhur kita marang kita,

⁴ora bakal didelikké kanggo anak putuné; nanging kita bakal nyritakké marang turunan sing mbésuk pepujian marang GUSTI lan kekuwatané, lan mujijat-mujijat sing wis ditindakké.

⁵Gusti wis mréntahké pepélingé marang turunané Yakub, lan angger-anggeré Torèt marang bangsa Israèl. Para leluhur kita pada dikongkon ngenalké kuwi marang para anak putuné,

⁶supaya diduduhké karo para turunané sak terusé, supaya anak-putuné sing arep teka sing bakal pada lair, pada ngadek lan nyritakké marang anak-anaké.

⁷Supaya pada pertyayaa marang Gusti Allah, lan aja lali marang sak kabèhé penggawéané, nanging pada netepana préntah-préntahé.

⁸Uga aja pada kaya para leluhuré, sing pada wangkot lan nglawan, turunan sing ora mantep atiné lan sing nyawané ora setia marang Gusti Allah.

⁹Turunané Efraim, suradadu tukang manah sing nganggo gaman genep, pada mundur waktu dinané perang.

¹⁰Pada ora nggondèli perjanjiané Gusti Allah lan pada emoh mlaku miturut Torèté.

¹¹Pada lali marang penggawéané lan mujijat sing ditindakké, sing wis diduduhké marang dèwèké kabèh.

¹²Gusti Allah wis nindakké mujijat-mujijat ing ngarepé para leluhuré, ing negara Egipte, ing ara-ara Soan;

¹³segara dibukak, para leluhur kita pada disabrangké; banyuné didekké kaya bendungan,

¹⁴ing wayah awan mlakuné para umat dituntun karo mendung, ing wayah mbengi karo pepadangé geni.

¹⁵Gunung watu ing ara-ara samun dibengkah, para leluhur mau terus pada dikèki banyu okèh kaya sangka segara gedé;

¹⁶sangka watu Gusti Allah didadèkké kali, grojokané banyuné kaya kali.

¹⁷Nanging para leluhur mau mblarah enggoné nggawé dosa marang Panjenengané, ya kuwi enggoné nglawan marang sing Mahaluhur ing ara-ara samun.

¹⁸Malah pada njajal Gusti Allah ing sak njeruhné atiné ya kuwi enggoné njaluk pangan kanggo nguja kekarepané.

¹⁹Pada rerasan bab Gusti Allah mengkéné: “Apa Gusti Allah ya kwasa nyediani pangan ing ara-ara samun?

²⁰Pantyèn panjenengané nggepuk watu terus metu banyuné lan terus ana kali-kali sing mili; nanging apa ya kwasa ngekèki roti, utawa nyepakké daging kanggo umaté?”

²¹Kuwi dirungokké karo GUSTI, njalari nesuné, sak nalika ana geni sing murup nyerang turunané Yakub lan bebenduné nyerang bangsa Israèl,

²²awit pada ora pertyaya marang Gusti Allah, lan ora pada pertyaya marang pitulungané.

²³Gusti Allah terus ngongkon mendung-mendung ing nduwur, lan mbukak lawang-lawangé langit,

²⁴umaté diudani manna kanggo pangané, lan pada dikèki gandum sangka langit;

²⁵saben wong wis mangan roti mulékat; pada dikirimi sangu pangan nganti turah-turah.

²⁶Gusti nekakké angin wétan ing awang-awang lan nggiring angin kidul karo kekuwatané;

²⁷umaté terus diudani daging tyatyahé kaya awu, lan diudani manuk sing karo swiwi tyatyahé kaya wediné segara;

²⁸pada ditibakké ing sak tengahé tarup-tarupé, ing sak ubengé panggonané mau.

²⁹Terus pada mangan nganti warek banget; Panjenengané ngekèki apa sing pada dikarepké.

³⁰Waktu ijik pada rumangsa durung warek, lan pangané ijik ing tutuké;

³¹Gusti Allah terus nesu marang wong-wong kuwi, gémbong-gémbongé pada dipatèni, lan para nom-nomané Israèl pada dientèkké.

³²Senajan mengkono, para leluhur mau ya ijik waé enggoné pada nglakoni dosa, lan ora pertyaya marang kabèh penggawéané Gusti Allah sing ngidap-idapi.

³³Mulané dina-dinané digawé entèk tanpa guna, lan taun-tauné pada entèk nang sak njeruhné rasa wedi.

³⁴Bareng pada dipatèni terus pada nakokké marang Panjenengané, pada mratobat lan pada nggolèki Gusti Allah;

³⁵pada kèlingan, yèn Gusti Allah kuwi gunung watuné, lan Gusti Allah sing Mahaluhur kuwi dadi Juru Penebusé.

³⁶Nanging pada ngapusi Panjenengané karo tutuké lan nggorohi Panjenengané karo ilaté.

³⁷Atiné ora mantep marang Panjenengané, lan ora setia marang perjanjiané.

³⁸Mung waé Panjenengané kuwi maha welas, gelem ngapura kesalahané lan ora matèni umaté; malah kerep ngendek bebenduné, lan ora nggugah kabèh nesu-Né.

³⁹Panjenengané gelem éling yèn wong kuwi kabèh daging, angin sing nyebul, sing ora bakal bali.

⁴⁰Kaping pira waé para leluhur mau enggoné pada nglawan marang Panjenengané ing ara-ara samun, lan enggoné pada nggawé sedihé atiné ing ara-ara samun!

⁴¹Bola-bali enggoné pada njajal marang Gusti Allah, lan enggoné pada nggawé nesuné atiné Gusti Allah Israèl sing Mahasutyi.

⁴²Pada ora éling marang pangwasané, lan marang dina waktu pada diluwari sangka tangané mungsuh,

⁴³waktu Panjenengané nganakké tanda-tanda ing negara Egipte, lan mujijat-mujijat ing ara-ara Soan.

⁴⁴Kali-kaliné lan ilèn-ilèné pada dipréntah dadi getih, sak nalika banyuné ora kena diombé;

⁴⁵nekakké laler sing mangan wong-wong mau, lan kodok-kodok sing ngentèkké wong-wong mau.

⁴⁶Tandur tukulané wong Egipte dipakakké marang ama uler, lan wohé rekasané marang walang.

⁴⁷Wité anggur pada dientèkké karo udan watu, lan wité ajir karo ebun kentel.

⁴⁸Pepantané kéwan-kéwan pada dipasrahké marang udan ès, lan kéwan-kéwané disamber karo bledèk.

⁴⁹Pada ditibani mulat-mulat bebenduné, panasé-nesuné lan kangèlan, uga mulékat sak grombol sing nggawa tyilaka;

⁵⁰Panjenengané ngumbar mulat-mulat bebenduné, nyawané pada ora diluwari sangka pati, nyawané pada dipasrahké marang lara pès;

⁵¹kabèh anak mbarepé wong Egipte pada dipatèni, wohé kekuwatané sing wiwitan ing tarup-tarupé Ham;

⁵²para umat duwèké terus pada dipréntahké budal kaya wedus gèmbèl, pada dituntun kaya kumpulan wedus-wedus ing ara-ara samun;

⁵³pada dituntun karo tentrem, nganti ora pada wedi, awit mungsuhé wis pada ketutup ing segara;

⁵⁴pada dituntun menyang tanah sutyi duwèké Gusti Allah, ya kuwi ing pegunungan iki, sing digawé karo tangan-Né sing tengen;

⁵⁵para bangsa pada ditundung sangka ngarepé umat, tanah panduman kuwi diedum-edum nganggo tali ukuran, lan kabèh taler Israèl pada dipréntahké ngenggoni tarup-tarupé.

⁵⁶Nanging bangsa Israèl pada njajal lan nglawan Gusti Allah sing Mahaluhur, lan ora pada netepi marang pepéling-pepélingé Gusti;

⁵⁷pada murtad lan ora setia kaya para leluhuré; pada nyimpang kaya gendéwa sing goroh;

⁵⁸pada nggawé nesuné atiné Gusti Allah karo puntuk-puntuk panggonané pangurbanané, lan ndadèkké panasé ati-Né awit sangka retya-retyané.

⁵⁹Bareng Gusti Allah krungu, nganti Panjenengané terus nesu banget, Israèl ditampik babar pisan;

⁶⁰mulané ninggalké griyané ing Silo, tarup sing wis dipanggoni ing antarané manungsa;

⁶¹kekuwatané terus dipasrahké dadi bandangan, kamulyané dipasrahké ing tangané mungsuh;

⁶²Panjenengané nglilani waé umaté dipangan karo pedang, lan bendu-Né marang umaté Piyambak.

⁶³Para wong nom-nomané pada dipangan karo geni, lan para prawané pada ora dilem menèh karo kidungan kekawinan;

⁶⁴para imam pada mati karo pedang, lan randané ora pada bisa nangisi.

⁶⁵Ing kono Gusti terus tangi, kaya wong sing keturon, kaya suradadu sing wis éling sangka enggoné mendem anggur;

⁶⁶mungsuh-mungsuhé pada digepuk nganti pada mundur, pada digawé ngalami kisinan selawasé.

⁶⁷Panjenengané nampik tarupé Yosèf, taler Efraim ora dipilih,

⁶⁸nanging sing dipilih taleré Yéhuda, gunung Sion sing ditrésnani;

⁶⁹griya sutyiné terus dibangun nganti sundul langit, kaya bumi sing dilandesi kanggo selawasé;

⁷⁰Panjenengané milih Daved, abdiné, dijikuk sangka sak tengahé kandang-kandang wedus;

⁷¹dijikuk sangka panggonané wedus-wedusé sing pada nusoni, dipasrahi ngengon turunané Yakub, umaté, ya bangsa Israèl umaté Piyambak.

⁷²Terus ya pada diengon karo sak tulusé ati, lan pada ketuntun karo kepinterané tangané.