Read Caribbean Javanese Masmur 79 Bible Online

Masmur 79 - Caribbean Javanese bible

Masmur 79

¹Masmuré Asaf. Duh Gusti Allah, bangsa liya wis pada mlebu menyang tanah duwèké Panjenengan, pada najisaké griya Panjenengan sing sutyi, Yérusalèm didadèkké ambruk.

²Layoné para abdi Panjenengan dipakakké marang manuk-manuk ing awang-awang, dagingé para katrésnan Panjenengan dipakakké marang kéwan galak ing ara-ara.

³Getihé umat Panjenengan dikutahké kaya banyu, ing sak ubengé Yérusalèm lan ora ana sing ngubur.

⁴Kita pada dadi tyatyatané para tangga-teparo kita, lan dadi guyonan lan olok-olokané wong sing manggon ing sak ubengé kita.

⁵Duh GUSTI, nganti sak pira suwéné enggèn Panjenengan tansah ngekèki bebendu Panjenengan, lan panasé ati Panjenengan anggèné mulat-mulat kaya geni?

⁶Bebendu Panjenengan supaya esokna marang para bangsa sing ora pada kenal karo Panjenengan, ya marang kabèh kraton sing ora nyebut asma Panjenengan;

⁷awit wis pada mangan Yakub nganti entèk, omahé dirusak.

⁸Panjenengan supaya aja nganti nibakké kesalahané para leluhur kita marang kita; kita supaya gelis ditibani karo kawelasan Panjenengan, awit kita wis pada ringkih banget.

⁹Duh Gusti Allah, sing nylametké kita, kita supaya pada Panjenengan kèki pitulungan awit sangka kaluhurané asma Panjenengan. Kita supaya pada diluwari lan dingapura dosa kita awit sangka asma Panjenengan.

¹⁰Kenèng apa nanging bangsa liya nganti pada ngomong mengkéné: “Ing ngendi Gusti Allahé wong kuwi?” Balesané getihé para abdi Panjenengan sing wis dikutahké, supaya dingertèni karo bangsa-bangsa liya ing ngarep kita.

¹¹Sambaté para wong sing dikunjara supaya bisaa tekan ing ngarepé Panjenengan; wong sing pada ditetepaké diukum mati, supaya Panjenengan lilani urip tyotyok karo tangan Panjenengan sing gedé.

¹²Lan para tangga kita supaya pada ditibani balesan tikel pitu, awit anggèné pada nyepèlèkké marang Panjenengan, duh Gusti.

¹³Kita kuwi, umat Panjenengan, ya kumpulan wedus ingon-ingonané Panjenengan, bakal terus pada masrahké maturkesuwun marang Panjenengan ing sak lawasé, lan kidung pujian marang Panjenengan bakal pada kita kabaraké nganti turun-temurun.