Read Caribbean Javanese Masmur 80 Bible Online

Masmur 80 - Caribbean Javanese bible

Masmur 80

¹Kanggo juru penyanyi, pamujiné kaya kidung: Kembang Bakung. Paseksiné Asaf. Masmur.

²Duh Juru Pangoné bangsa Israèl, supaya gelem ngrungokké. Panjenengan sing nggiring turunané Yosèf kaya kumpulan wedus gèmbèl, Panjenengan sing numpak kerup-kerup, supaya gelem ngétok karo semlorot Panjenengan,

³ing ngarepé Efraim karo Bényamin lan Manasé. Panjenengan supaya gelem ngétokké kekuwatan Panjenengan lan supaya gelem teka ngluwari kita.

⁴Duh Gusti Allah, kita supaya pada Panjenengan pulihké, supaya gelem nylorotké praupan Panjenengan, nganti kita pada bakal olèh slamet.

⁵Duh GUSTI, Gusti Allah sing ngwasani langit lan bumi, ijik pira suwéné enggèn Panjenengan bendu senajan umat Panjenengan ndedonga?

⁶Umat Panjenengan pada Panjenengan pangani roti tètèsané luh, Panjenengan kèki ngombé luh nganti okèh banget,

⁷kita pada Panjenengan dadèkké tyatyatané para tangga-teparo, lan pada dadi geguyoné karo mungsuh-mungsuh kita.

⁸Duh Gusti Allah sing ngwasani langit lan bumi, kita supaya pada Panjenengan pulihké, supaya gelem nylorotké praupan Panjenengan, nganti kita pada olèh slamet.

⁹Panjenengan wis njupuk wit anggur sangka negara Egipte, para bangsa pada Panjenengan tundungi, wit anggur iki terus Panjenengan tandur.

¹⁰Panjenengan wis nyepakké panggonan, wit anggur iki terus ngoyot jeru banget lan ngebaki negara;

¹¹gunung-gunung pada kayoman karo ayang-ayangé, lan wit-witan tyemara duwèké Gusti Allah pada kayoman karo pangé;

¹²pangé sing tyilik-tyilik pada ngglolor nganti tekan segara, lan putyuk-putyuké nganti tekan kali Efrat.

¹³Apa sebabé Panjenengan ngembrukké pageré, nganti dipetiki karo wong sing pada liwat?

¹⁴Digrogoti karo babi alasan, lan dipangan karo kéwan-kéwan ing ara-ara.

¹⁵Duh Gusti Allah sing ngwasani langit lan bumi, Panjenengan supaya gelem mbalik, weruh sangka langit lan Panjenengan supaya gelem nggatèkké wit anggur kuwi,

¹⁶wit sing ditandur karo tangan Panjenengan sing tengen.

¹⁷Wité wis pada diobong lan ditegori, wong-wong iki ya bèn pada entèk kabèh karo bebendu Panjenengan.

¹⁸Panjenengan supaya gelem njaga marang para wong ing sisih tengen Panjenengan, anaké manungsa sing wis Panjenengan kuwatké kanggo Panjenengan piyambak.

¹⁹Kita pada ora bakal nyimpang sangka Panjenengan, kita supaya Panjenengan uripi, terus pada bakal nyebut ngluhurké asma Panjenengan.

²⁰Duh GUSTI, Gusti Allah sing ngwasani langit lan bumi, kita supaya pada Panjenengan pulihké, supaya gelem nylorotké praupan Panjenengan, nganti kita pada bakal olèh slamet.