Read Caribbean Javanese Masmur 81 Bible Online

Masmur 81 - Caribbean Javanese bible

Masmur 81

¹Kanggo juru penyanyi. Miturut nyanyian: Gitit. Masmuré Asaf.

²Pada surak-suraka kanggo Gusti Allah, sing dadi kekuwatan kita, pada surak-suraka kanggo Gusti Allahé Yakub.

³Pada ngidunga karo terbangan lan siter, sing harmoni bareng swarané harep.

⁴Ngunèkna trompèt ing tanggal sepisan, ing tanggal mbulan bunder ing dina riyaya kita.

⁵Awit bab kuwi dadi pernatan kanggo bangsa Israèl, lan dadi pernatan sangka Gusti Allahé Yakub.

⁶Sing mantyep dadi pepakon marang Yosèf, waktu Gusti Allah metu ngluruk negara Egipte. Aku krungu bangsa sing aku durung tau weruh.

⁷“Pundaké wis Tak luwari sangka enggoné mikul, lan tangané sangka kranjangé pikulan;

⁸sak njeruhné kangèlan kowé pada sambat, Aku terus ngetokké kowé, Aku nuruti penjalukmu sangka mburiné gluduk, Aku wis njajal kowé ing sak tyedaké banyu Mériba. Sela

⁹Hé para umat-Ku pada rungokna, Aku arep ngekèki pepélingé marang kowé; hé Israèl, yèn kowé gelem ngrungokké marang tembung-Ku.

¹⁰Ing tengahmu aja ana allah liyané, kowé aja sujut marang allah mantya.

¹¹Ya Aku iki GUSTI, Gusti Allahmu, sing ngluwari kowé sangka negara Egipte, tutukmu angapna sing amba, terus bakal Tak kebaki.

¹²Nanging umat-Ku ora ngrungokké marang swara-Ku, lan Israèl ora seneng marang Aku.

¹³Mulané terus Tak atoské atiné sing wangkot kuwi, bèn pada nglakoni sak karepé déwé.

¹⁴Ah, yèn umat-Ku ngrungokké marang tembung-Ku, yèn Israèl mlaku ing dalan sing Tak duduhké.

¹⁵Sak nalika kuwi uga mungsuhé mesti Tak telukké, lan mungsuhé pada ngrasakaké antepé tangan-Ku.

¹⁶Para wong sing sengit marang GUSTI, bakal nyembah ndilat sikilé, lan iki wis dadi nasipé sak lawas-lawasé.

¹⁷Nanging umat-Ku bakal Tak wènèhi mangan gandum sing apik déwé malah bakal pada Tak wareki karo madu sangka watu.”