Read Caribbean Javanese Masmur 85 Bible Online

Masmur 85 - Caribbean Javanese bible

Masmur 85

¹Kanggo juru penyanyi. Masmuré turunané Korah.

²Duh GUSTI, Panjenengan wis ngétokké senengé ati Panjenengan marang tanah Panjenengan, kahanané turunané Yakub wis Panjenengan pulihké.

³Panjenengan wis ngapura kesalahané umat Panjenengan, kabèh dosané wis Panjenengan tutupi. Sela

⁴Kabèh nesu Panjenengan wis Panjenengan sirep, bebendu Panjenengan sing mulat-mulat wis Panjenengan leremké.

⁵Duh Gusti Allah, Juruslamet kita, kita supaya pada Panjenengan pulihké, Panjenengan supaya gelem ngilangi nesuné ati Panjenengan kanggo kita.

⁶Kita apa pada bakal Panjenengan nesoni ing sak lawasé, lan enggèn Panjenengan nesu apa bakal Panjenengan terusaké nganti turun-temurun?

⁷Apa Panjenengan ora gelem nguripké menèh kita, supaya umat Panjenengan bisa bungah-bungah awit sangka Panjenengan?

⁸Duh GUSTI, Panjenengan supaya gelem ngétokké kawelasan Panjenengan marang kita, lan gelem ngekèki katentreman Panjenengan marang kita.

⁹Aku arep ngrungokké apa sing dadi tembungé Gusti Allah, GUSTI. Apa ora tentrem rahayu sing bakal dipréntahké marang umaté lan marang para katrésnan-Né, supaya aja nganti bali marang gemunggungé menèh?

¹⁰Tenan, katentreman sing sangka Gusti kuwi tyumawis kanggo wong sing wedi lan ngajèni marang Panjenengané, terus negara kita kanggonan kamulyan.

¹¹Kawelasan lan kasetian bakal pada tempuk keadilan lan katentreman bakal pada ambung-ambungan.

¹²Kasetian bakal tukul sangka bumi, lan keadilan bakal ngawat-awati sangka langit.

¹³Tur GUSTI bakal ngekèki samubarang sing betyik, lan negara kita bakal ngekèkké pametuné.

¹⁴Keadilané bakal mlaku ing ngarepé, lan tipak-tilasé sikilé didadèkké dalan.