Read Caribbean Javanese Masmur 86 Bible Online

Masmur 86 - Caribbean Javanese bible

Masmur 86

¹Pandongané Daved. Duh GUSTI, Panjenengan supaya gelem ngrungokké lan gelem nyauri, awit kula ngalami sangsara lan kasusahan.

²Nyawa kula supaya Panjenengan rumat, awit Panjenengan trésna marang kula, Panjenengan supaya gelem ngluwari abdi Panjenengan sing pertyaya marang Panjenengan kuwi.

³Duh Gusti, Panjenengan kuwi Gusti Allah kula, kula supaya Panjenengan welasi, awit sedina muput enggèn kula sambat marang Panjenengan.

⁴Panjenengan supaya gelem mbungahké nyawané abdi Panjenengan awit, duh Gusti, nyawa kula teka marang Panjenengan.

⁵Awit Panjenengan kuwi apik, duh Gusti, lan seneng ngapura, apa menèh kawelasan Panjenengan kuwi lubèr kanggo wong sing sambat marang Panjenengan.

⁶Duh GUSTI, Panjenengan supaya gelem ngrungokké pandonga kula, lan gelem nggatèkké swarané penjaluk kula.

⁷Ing dina kangèlan kula, kula sambat marang Panjenengan, awit Panjenengan gelem nyauri marang kula.

⁸Duh Gusti Allah, ing antarané para allah ora ana sing madani Panjenengan, lan ora ana sing madani penggawéané Panjenengan.

⁹Duh Gusti, kabèh bangsa, sing Panjenengan dadèkké, pada bakal teka sujut nyembah ing ngarepé Panjenengan, lan bakal ngluhurké asma Panjenengan.

¹⁰Awit Panjenengan kuwi gedé lan nindakké mujijat-mujijat; ya mung Panjenengan déwé kuwi sing dadi Gusti Allah.

¹¹Duh GUSTI, kula supaya Panjenengan duduhké dalan Panjenengan, supaya mlaku kula manuta, ing kabeneran Panjenengan; ati kula supaya Panjenengan mantepké supaya wedi-asih marang asma Panjenengan.

¹²Duh Gusti, Gusti Allah kula, kula bakal masrahké maturkesuwun karo sak kabèhé ati marang Panjenengan lan ngluhurké asma Panjenengan tekan sak lawas-lawasé;

¹³awit gedé kawelasan Panjenengan marang kula, lan nyawa kula wis Panjenengan tulungi sangka ndonyané wong mati sing jeru déwé.

¹⁴Duh Gusti Allah, wong sing sombong pada ngadek nyerang kula, lan grombolané wong gemunggung pada arep njabut nyawa kula, lan ora perduli marang Panjenengan.

¹⁵Nanging Panjenengan kuwi, duh Gusti, Gusti Allah sing kebak welas asih lan trésna, gedé kesabarané Panjenengan lan lubèr kawelasan lan kasetian Panjenengan.

¹⁶Kula supaya Panjenengan delok lan dikèki kawelasan, abdi Panjenengan supaya Panjenengan kèki karosan Panjenengan, anak lanangé Panjenengan supaya diluwarana.

¹⁷Kula supaya Panjenengan kèki tanda sing apik, supaya para satru kula pada ngerti karo kisinan, yèn Panjenengan duh GUSTI, wis ngekèki pitulungan lan panglipuran marang kula.