Read Caribbean Javanese Masmur 89 Bible Online

Masmur 89 - Caribbean Javanese bible

Masmur 89

¹Kidung piwulang, masmuré Etan, wong Esrahi.

²Katrésnané GUSTI bakal kula kidungké selawasé, kasetian Panjenengan bakal kula kabaraké karo tutuk kula turun-temurun.

³Awit kawelasan Panjenengan dibangun tekan sak lawas-lawasé; kasetian Panjenengan jejek kaya langit.

⁴Panjenengan wis ngomong: “Aku wis nggawé perjanjian karo pilihan-Ku, Aku wis sumpah marang Daved, abdi-Ku.

⁵Wijimu Tak tetepké tekan sak lawas-lawasé, lan damparmu Tak bangun nganti turun-temurun.” Sela

⁶Awit sangka kuwi langit ngutyap sukur awit sangka mujijat Panjenengan, duh GUSTI, malah ya jalaran sangka kasetian Panjenengan ing sak tengahé pasamuané para sutyi.

⁷Awit ing mendung-mendung kuwi sapa sing madani GUSTI, lan ing antarané para sing manggon ing swarga sapa sing madani GUSTI?

⁸Gusti Allah diwedèni karo golongané para sutyi, lan banget diwedèni ngungkuli kabèh sing pada manggon ing sak kiwa-tengené.

⁹Duh GUSTI, Gusti Allah sing ngwasani langit lan bumi, sapa sing kaya Panjenengan? Panjenengan kuwi kuwat, duh GUSTI lan kasetian Panjenengan ing sak ubengé Panjenengan.

¹⁰Gemunggungé segara kuwi Panjenengan sing mréntah, yèn aluné gedé Panjenengan sing ngendekké.

¹¹Rahab wis Panjenengan remuk kaya wong sing mati, mungsuh Panjenengan wis Panjenengan buyaraké karo tangan Panjenengan sing rosa.

¹²Langit kuwi duwèké Panjenengan, bumi kuwi uga duwèké Panjenengan, ndonya sak isiné kabèh kuwi Panjenengan sing ndasari.

¹³Lor lan kidul kuwi Panjenengan sing nggawé, gunung Tabor lan Hèrmon pada bungah-bungah surak-surak awit sangka asma Panjenengan.

¹⁴Panjenengan sing nduwé lengen kuwat tangan Panjenengan kuwi rosa lan luhur tangan Panjenengan tengen.

¹⁵Kabeneran karo keadilan dadi dasaré dampar Panjenengan, kawelasan lan kasetian pada mlaku ing ngarepé Panjenengan.

¹⁶Rahayu bangsa sing bisa surak-surak, duh GUSTI, uripé keslorotan karo praupan Panjenengan,

¹⁷pada surak-surak sedina muput awit sangka asma Panjenengan, lan pada rumangsa luhur awit keadilan Panjenengan.

¹⁸Awit Panjenengan sing dadi kamulyané kekuwatané, sungu kula diunggulké awit sangka senengé ati Panjenengan.

¹⁹Awit tamèngé kita kuwi duwèké GUSTI, lan ratu kula kuwi duwèké Gusti Allahé Israèl, sing Sutyi.

²⁰Wis tau ana tembungé Panjenengan karo wahyu marang para wong sing Panjenengan trésnani, isiné: “Aku wis ngekèki makuta marang sakwijiné pahlawan, sakwijiné wong pilihan wis Tak junjung sangka antarané bangsa kuwi.

²¹Aku wis nemu Daved, abdi-Ku, sing wis Tak jebatani karo lenga-Ku sing sutyi.

²²Kuwi bakal tetep Tak rumati karo tangan-Ku, lan Tak santosaké karo lengen-Ku.

²³Kuwi ora bakal dilawan karo mungsuh, uga ditelukaké karo wong lityik.

²⁴Mungsuhé bakal pada Tak remuk ing ngarepé, lan sing pada nyengiti bakal Tak entèkké

²⁵Kuwi bakal dituntun karo kasetian lan katrésnan-Ku, lan sunguné bakal diunggulké karo asma-Ku,

²⁶Aku bakal ndadèkké tangané ngwasani segara, lan tangané tengen ngwasani kali-kali.

²⁷Nyebuté marang Aku bakal mengkéné: ‘Panjenengan kuwi Bapak kula, Gusti Allah kula lan gunung watu keslametan kula.’

²⁸Lan ya bakal Tak junjung dadi anak mbarep, lan sing luhur déwé ing antarané para ratu ing sak lumahé bumi.

²⁹Kasetian-Ku marang dèwèké bakal Tak lestarèkké tekan selawasé, lan perjanjian-Ku bakal tetep kanggo dèwèké.

³⁰Anak putuné Tak lestarèkké terusan tekan selawasé, uga damparé ing sak umuré langit.

³¹Yèn anak putuné pada nglalèkké angger-angger-Ku, lan mlakuné ora miturut karo pernatan-Ku,

³²lan pada nerak marang katetepan-Ku, lan ora netepi pepakon-Ku,

³³paneraké mesti pada Tak wales karo gepuk, lan kesalahané karo gebuk.

³⁴Nanging kasetian-Ku bakal ora Tak adohaké sangka Daved, lan Aku ora bakal nyélaki kasetian-Ku.

³⁵Aku ora bakal nerak marang perjanjianku, lan apa sing kebukak sangka ilat-Ku ora bakal Tak owahi.

³⁶Sepisan Aku wis sumpah kanggo kesutyian-Ku, mesti Aku ora bakal goroh marang Daved.

³⁷Turun-turunané bakal tetep sak lawas-lawasé, lan damparé kaya srengéngé ing ngarep-Ku,

³⁸kaya mbulan ing sak lawas-lawasé kanggo seksi sing setia tuhu ing mendung.” Sela

³⁹Nanging Panjenengan piyambak nampik lan mbuwang, lan nibakké bebendu Panjenengan marang sing Panjenengan jebatani,

⁴⁰perjanjian Panjenengan karo abdi Panjenengan batalké, makutané Panjenengan regeti kaya lebu,

⁴¹témboké Panjenengan ambruké, bèntèng-bèntèngé Panjenengan dadèkké ambruk.

⁴²Kabèh wong sing liwat ing dalan pada ngrayahi, lan dadi tyatyatan kanggo tangga teparo.

⁴³Tangan tengené para mungsuhé pada Panjenengan duwuraké, kabèh mungsuh-mungsuhé wis pada Panjenengan nggawé bungah-bungah.

⁴⁴Landepé pedangé Panjenengan digawé mbalik, Panjenengan ora nggawé supaya bisa kuwat ing peperangan.

⁴⁵Padangé Panjenengan dibleretké, lan damparé Panjenengan diambrukké ing lemah.

⁴⁶Dina enomé wis Panjenengan tyendekké; dèwèké Panjenengan krukupi karo kewirangan. Sela

⁴⁷Duh GUSTI, nganti pira suwéné enggèn Panjenengan tansah ing pandelikan, lan anggèné bebendu Panjenengan mulat-mulat kaya geni kuwi?

⁴⁸Panjenengan supaya gelem éling apa tegesé urip kuwi sak pira ta suwéné, apa tanpa nggawé enggèn Panjenengan sing nggawé kabèh anaké manungsa kuwi?

⁴⁹Wong urip ing ngendi sing ora bakal ngalami mati, sing bisa ngutyuli nyawané sangka kwasané ndonyané wong mati? Sela

⁵⁰Duh Gusti, endi kawelasan Panjenengan sing wiwitan, sing Panjenengan janjèkké marang Daved nganggo sumpah karo kasetian Panjenengan kuwi?

⁵¹Duh Gusti, Panjenengan supaya gelem éling yèn abdi Panjenengan disepatani, lan kula nyangga ing njeruhné ati, ngalami dienyèk-enyèk karo para bangsa.

⁵²Sing diomongké para mungsuh Panjenengan, duh GUSTI, sing diomongké kanggo nyepèlèkké tindak-tanduké wong sing Panjenengan jebatani.

⁵³Pinujia GUSTI sak lawasé. Amin. Amin!