Read Caribbean Javanese Masmur 9 Bible Online

Masmur 9 - Caribbean Javanese bible

Masmur 9

¹Kanggo juru penyanyi. Miturut nyanyian: Mut-Labèn. Masmuré Daved.

²Kula arep maturkesuwun marang GUSTI karo sak kabèhé atiku, kula arep tyerita kabèh mujijat Panjenengan.

³Kula bakal bungah-bungah lan sukak-sukak awit sangka Panjenengan, Asma Panjenengan kula puji karo masmur, duh Gusti, Mahaluhur,

⁴awit mungsuh kula pada mundur, ambruk terus entèk ing ngarepé Panjenengan.

⁵Awit Panjenengan sing mbélani perkara kula lan wewenangé kula, nganti kula olèh kabeneran, Panjenengan njagong ing dampar dadi Rèkter sing adil.

⁶Para bangsa pada Panjenengan ukum, para wong duraka Panjenengan tumpes; jenengé Panjenengan entèkké langgeng ing sak lawasé.

⁷Mungsuh wis pada entèk tyutes, dadi gempuran gunduk-gundukan ing sak lawasé, kutané wis pada Panjenengan gempuri, wis ora diélingi menèh babar pisan.

⁸Nanging GUSTI wis njagong ing dampar selawasé, damparé sing diedekaké kuwi kanggo nindakké pengadilan.

⁹Ya Panjenengané kuwi sing ngukumi ndonya karo adil, lan ngadili para bangsa karo titis.

¹⁰Ya mengkono kuwi enggoné GUSTI dadi pangungsèn kanggo wong sing ditindes, dadi pangungsèn ing waktu kangèlan.

¹¹Wong sing kenal karo asma Panjenengan, kuwi pada pertyaya marang Panjenengan, awit Panjenengan, ora tau négakké wong sing nggolèki Panjenengan, duh GUSTI.

¹²Pada ngidunga masmur kanggo GUSTI, sing manggon ing Sion. Pada tyritakna penggawéané ing tengahé para bangsa.

¹³Nanging Panjenengané sing mbales marang wong sing ngutahké getih, éling marang wong sing ditindes, ora lali marang sambaté.

¹⁴Duh GUSTI, kula supaya Panjenengan welasi, supaya ndelok kangèlan kula awit sangka penggawéané para wong sing sengit marang kula; Panjenengan sing ngetokké kula sangka gapurané pati.

¹⁵Supaya kula bisa tyerita kabèh penggawéané Panjenengan, sing wajip dipuji kuwi, lan ing gapurané putri Sion, kula surak-surak, awit keslametan pawèh Panjenengan.

¹⁶Bangsa-bangsa wis pada ketyemplung ing juglangan gawéané déwé, sikilé pada kenèk jiret, pasangané déwé.

¹⁷GUSTI wis nglairké dèkné, Panjenengané nindakké pengadilan; wong duraka kejiret karo pasangané déwé. Higayon. Sela

¹⁸Para wong duraka bakal pada bali menyang panggonané wong mati, malah uga kabèh bangsa sing pada lali marang Gusti Allah.

¹⁹Awit wong mlarat kuwi ora dilalèkké ing sak terusé, wong sing kasusahan ora kélangan pengarep-arep selawasé.

²⁰Duh GUSTI, supaya gelem tangi, manungsa aja nganti olèh nyombongaké dèwèké, para bangsa pada kudu ditibani pengadilan ing ngarepé Panjenengan.

²¹Duh Gusti, supaya kabèh Panjenengan gawé gemeter, supaya para bangsa pada ngakoni, yèn dèwèké mung manungsa waé.