Read Caribbean Javanese Masmur 90 Bible Online

Masmur 90 - Caribbean Javanese bible

Masmur 90

¹Pandongané Moses, abdiné Gusti Allah. Duh Gusti, Panjenengan kuwi dadi pangungsèn kita turun-temurun.

²Sak durungé gunung-gunung dilairké, lan sak durungé Panjenengan nggawé bumi lan ndonya, wiwit kelanggengan tekan kelanggengan Panjenengan kuwi Gusti Allah.

³Panjenengan mbalèkké manungsa dadi lebu, lan préntah: “Hé para anak-anaké manungsa, pada balia!”

⁴Awit 1000 taun kuwi ing mripat Panjenengan, pada kaya dina wingi sing kepungkur, ya pada kaya gilirané jaga ing wantyi wengi.

⁵Manungsa Panjenengan kéntéraké; pada kaya ngimpi, kaya tukulé suket.

⁶Ing wantyi ésuk kembang lan seger tukulé, soréné wis semplak terus alum.

⁷Tenan, kita pada entèk awit sangka bebendu Panjenengan, lan ketiban rasa wedi awit sangka panasé-nesuné Panjenengan.

⁸Kesalahané kita Panjenengan bèbèr ing ngarepé Panjenengan, lan ala kita sing didelikké ing pepadangé sloroté praupan Panjenengan.

⁹Tenan dina kita pada liwat awit sangka bendu Panjenengan, taun-taun kita, kita entèkké kaya waé sambat.

¹⁰Suwéné urip kita kuwi pitung puluh taun, nanging yèn kita pada kuwat, wolung puluh taun, lan sing digedèk-gedèké kuwi anggèné ngalami rekasa lan sangsara, awit mlakuné gelis banget lan kita pada kabur entèk.

¹¹Sapa sing ngerti kekuwatané bebendu Panjenengan, lan wedi marang enggèn Panjenengan nesu?

¹²Wulangana kita supaya ngitung dina kita sing sak mestiné, supaya bisaa olèh ati sing wityaksana.

¹³Duh GUSTI, Panjenengan supaya gelem mbalik! Nganti kapan? Supaya gelem melasi para abdi Panjenengan.

¹⁴Supaya ing wantyi ésuk kita pada Panjenengan wareki karo kawelasan Panjenengan nganti kita terus pada surak-surak lan bungah-bungah sak lawasé kita urip.

¹⁵Kita supaya pada Panjenengan kèki kebungahan sing sak pantesé karo suwéné dina-dina enggèn Panjenengan ngekèki kangèlan, lan sak pantesé karo suwéné taun-taun enggèn kita ngrasaké tyilaka.

¹⁶Penggawéané Panjenengan supaya bisaa kétok marang para abdi Panjenengan, lan kamulyan Panjenengan marang anak-anaké.

¹⁷Kabetyikané Gusti Allah kita, supaya ngayomi kita, lan Panjenengan supaya gelem nguwatké penggawéané tangan kita, ya penggawéané tangan kita, kuwi supaya dikuwatké.