Read Caribbean Javanese Masmur 92 Bible Online

Masmur 92 - Caribbean Javanese bible

Masmur 92

¹Masmur, kidungan ing dina sabat.

²Maturkesuwun marang GUSTI karo kidungan kuwi apik, mengkono uga nyanyèkké kidung masmur marang asma Gusti, duh Gusti Allah sing Mahaluhur,

³kula nyeritakké kabetyikané Gusti ing wantyi ésuk lan kasetiané Gusti ing wantyi wengi,

⁴karo ngunèkné unèn-unèn sepuluh tali karo terbangan, bareng karo swarané siter.

⁵Nanging Panjenengan, duh GUSTI, wis mbungahké kula karo penggawéané Panjenengan, kula bakal surak-surak awit sangka penggawéané tangan Panjenengan.

⁶Duh GUSTI, tenan gedé penggawéané Panjenengan, lan banget jeru rantyamané Panjenengan kuwi.

⁷Wong bodo ora bakal weruh, lan wong goblok uga ora bakal ngerti bab kuwi.

⁸Yèn wong duraka anggèné urip pada kaya tetukulan, lan wong sing nandangi ala pada tukul subur kuwi supaya pada dientèkké ing sak lawas-lawasé.

⁹Nanging, duh GUSTI, Panjenengan ing nduwur tekan sak lawasé.

¹⁰Awit tenan mungsuh Panjenengan, duh GUSTI, ya tenan mungsuh Panjenengan bakal entèk, kabèh wong sing nandangi ala bakal dibuyaraké.

¹¹Nanging sungu kula Panjenengan unggahké kaya sunguné sapi alasan, kula diesoki karo lenga murni sing anyar;

¹²mripatku nyawang satruku, kupingku krungu bab wong ala sing pada ngadek nglawan aku.

¹³Wong bener bakal tukul kaya wit kurma, lan tukul subur kaya wit tyemara sangka Libanon;

¹⁴para wong sing ditandur ing griyané GUSTI, bakal pada tukul ing lataré Gusti Allah kita,

¹⁵senajan wis tuwa ijik pada metu wohé, pada dadi lemu lan seger,

¹⁶supaya bisa nyritakké yèn GUSTI kuwi bener, gunung watuku sing adoh sangka laku goroh.