Read Caribbean Javanese Masmur 94 Bible Online

Masmur 94 - Caribbean Javanese bible

Masmur 94

¹Duh Gusti Allah sing nibakké balesan, duh GUSTI, duh Gusti Allah sing nibakké balesan, Panjenengan supaya gelem ngadek!

²Duh Rèkteré jagat, supaya gelem ngadek, supaya gelem nibakké balesan marang sak rupané penggawéané wong sombong!

³Nganti sak pira suwéné menèh para wong duraka, duh GUSTI, nganti sak pira suwéné menèh wong duraka pada seneng-seneng?

⁴Wong-wong iki pada muntahké tembung-tembung sing kurang ajar, lan sak okèhé wong sing nandangi ala pada gemunggung.

⁵Duh GUSTI, wong iki pada ngiles-ngiles umat Panjenengan, lan para duwèké Panjenengan piyambak pada ditindes;

⁶pada mbelèhi randa lan wong mantya, lan matèni botyah lola;

⁷lan pada ngomong mengkéné: “GUSTI ora weruh, lan Gusti Allahé Yakub ora nggatèkké.”

⁸Hé! para wong sing bodo tunggalé rayat, pada gatèkna! Hé! para wong goblok, piyé enggonmu pada bisa mikir?

⁹Gusti Allah sing masang kuping apa ora krungu? Sing nggawé mripat apa ora weruh?

¹⁰Sing ngekèki piwulang marang para bangsa, apa ora nibakké paukuman? Panjenengané sing mulangké kaweruh marang manungsa?

¹¹GUSTI ngerti kabèh rantyamané manungsa, kuwi kabèh sejatiné tanpa guna.

¹²Duh GUSTI, rahayu wong sing Panjenengan ajar, sing Panjenengan wulangi sangka angger-angger Panjenengan,

¹³supaya kenènga digawé nentremaké atiné ing njeruhné ngalami kangèlan, nganti tekan waktuné wong duraka diduduké juglangan.

¹⁴Nanging GUSTI ora négakké umaté, lan ora bakal ninggalké marang umat duwèké.

¹⁵Awit putusané hukum bakal bali marang keadilan, lan diturut karo kabèh wong sing tulus atiné.

¹⁶Sapa sing ngréwangi aku nglawan marang para wong ala, sapa sing ngréwangi aku nglawan marang para wong sing nglakoni sing ala?

¹⁷Yèn duduk GUSTI sing mitulungi aku, mèh waé aku manggon ing jagat suwung.

¹⁸Waktu kula mikir: “Sikilku déglok,” terus dikuwatké karo kawelasané Panjenengan.

¹⁹Yèn ing batin kula saya mundak okèh sing kula pikir; panglipuran Panjenengan sing ngayemké ati kula.

²⁰Panjenengan apa bakal nunggal karo damparé ala, sing ngrantyam tyilaka karo katetepan?

²¹Pada bebarengan nglawan nyawané wong bener, lan getihé wong sing ora salah diarani duraka.

²²Nanging GUSTI kuwi bèntèngku sing kuwat, lan Gusti Allahku kuwi gunung watuku pangungsènku.

²³Gusti Allah sing mbales penggawé alané wong-wong mau, lan jalaran sangka penggawé alané bakal pada dientèkké. GUSTI, Gusti Allah kita, bakal ngentèkké wong-wong kuwi.