Read Caribbean Javanese Masmur 96 Bible Online

Masmur 96 - Caribbean Javanese bible

Masmur 96

¹Pada ngluhurna GUSTI karo kidung anyar, hé wong sak lumahé bumi, pada ngidunga kanggo GUSTI!

²Pada ngidunga kanggo GUSTI, luhurna asmané, pawèhé keslametan kuwi wartakna ing saben dina.

³Pada tyritakna kamulyan-Né ing antarané para bangsa, lan mujijat ing antarané kabèh taleré bangsa.

⁴Awit GUSTI kuwi Mahaluhur lan banget pinujiné, lan ngidap-idapi ngungkuli kabèh para allah.

⁵Awit kabèh allahé para bangsa kuwi tanpa guna, nanging GUSTI kuwi sing nggawé langit,

⁶kahurmatan lan kamulyan ing ngarepé Gusti, karosan lan kehormatan ing panggonan griya sutyi-Né.

⁷Hé kabèh para taleré bangsa, ngakoni marang GUSTI, ya mung marang GUSTI kamulyan lan karosan kuwi!

⁸GUSTI pasrahana kamulyané asma-Né, nggawaa pisungsung lan ngadepa ing plataran-Né.

⁹Pada sujuta marang GUSTI karo nganggo kesutyian, hé sak ratané bumi kabèh, gemetera ing ngarepé Gusti.

¹⁰Pada wartakna ing antarané para bangsa: “GUSTI kuwi Ratu! Tenan ndonya kuwi jejek kuwat, ora goyang, Panjenengané bakal ngadili para bangsa karo sing bener.”

¹¹Langit bèn bungah-bungah lan bumi surak-surak, lan segara uga sak isiné bèn pada gemrubuk!

¹²Ara-ara uga sak isiné bèn pada bungah; ing kono kabèh wit-witan ing alas pada surak-surak,

¹³ing ngarepé GUSTI, awit Panjenengané teka, awit teka-Né bakal ngadili ndonya, ndonya bakal diadili karo adil, lan para bangsa karo kasetian-Né.