Read Caribbean Javanese Masmur 97 Bible Online

Masmur 97 - Caribbean Javanese bible

Masmur 97

¹GUSTI kuwi Ratu, sak lumahé bumi bèn surak-surak, puluh-puluh bèn okèh sing pada bungah!

²Panjenengané kubengan karo mendung lan pepeteng, keadilan lan pernatan sing dadi dasaré dampar-Ré.

³Geni mlaku ing ngarepé, lan nggosongké mungsuhé ing sak kiwa-tengené.

⁴Kilaté pada madangi ndonya, bumi weruh lan nganti gemeter.

⁵Gunung-gunung terus ndlèdèk kaya lilin ing ngarepé GUSTI, ing ngarepé Gustiné sak lumahé bumi.

⁶Langit ngabarké keadilan-Né, lan kabèh bangsa pada nyawang kaluhuran-Né.

⁷Sak rupané wong sing ngabekti marang retya bakal pada ngalami kisinan, wong sing pada gemunggung awit sangka brahala-brahala; kabèh allah pada sujut nyembah marang Panjenengané.

⁸Sion krungu kabar iki, nganti bungah, lan para anaké wadon Yéhuda pada surak-surak, awit sangka paukuman Panjenengan, duh GUSTI.

⁹Awit Panjenengan kuwi, duh GUSTI, sing Mahaluhur, sing ngwasani sak lumahé bumi, Panjenengan diluhurké banget ngliwati kabèh allah.

¹⁰Hé wong sing pada trésna marang GUSTI pada sengita marang sing ala! Panjenengané sing njaga nyawané para wong sing ditrésnani, bakal ngluwari wong-wong kuwi sangka tangané para wong duraka.

¹¹Pepadang wis semlorot kanggo para wong bener, lan kabungahan kanggo para wong sing jujur atiné.

¹²Hé para wong bener, pada bungah-bungaha awit sangka GUSTI, lan memujia kidung kesuwun kanggo asma-Né sing sutyi.