Read Caribbean Javanese Wulang Bebasan 1 Bible Online

Wulang Bebasan 1 - Caribbean Javanese bible

Wulang Bebasan 1

¹Wulang bebasané ratu Salomo, anaké ratu Daved, ratuné Israèl,

²kanggo ngekèki kawityaksanan lan piwulang, supaya ngerti marang tembung-tembung sing ana tegesé,

³kanggo nampani piwulang sing ndadèkké pinter, bener, adil lan jujur,

⁴kanggo ngekèki kepinteran marang wong sing ora nduwé pengalaman, kaweruh lan kawityaksanan marang wong enom.

⁵Wong sing wityaksana, betyik rungokna, supaya tambah kaweruh, lan wong sing nduwé pangertèn supaya olèh perkara-perkara sing kena kanggo tetimbangan,

⁶kanggo mengertèni isiné wulang bebasan lan plambang, uga tetembungan lan bedèkané sangka para wong wityaksana.

⁷Wedi lan ngajèni marang GUSTI kuwi wiwitané kawityaksanan, nanging wong bodo pada ngrèmèhké kawityaksanan lan piwulang.

⁸Hé anakku, rungokna marang gulawentahé bapakmu, lan aja ninggal piwulangé ibumu;

⁹awit ontyèn-ontyèn kembang sing apik kuwi kanggo sirahmu, lan kalung kanggo gulumu.

¹⁰Hé anakku, yèn kowé dibujuk karo wong dosa, kowé aja nuruti;

¹¹yèn wongé pada nduwé tembung: “Mèlua kita, hayuk pada ngutahké getih, ngindik marang wong sing ora salah, karo tanpa sebab;

¹²hayuk kuwi pada diuntal uripan, kaya ndonyané wong mati, diuntal pisan kaya wong mati sing diuntal kuburan;

¹³nganti kita pada olèh barang rupa-rupa sing okèh ajiné, pada bisa ngebaki omah kita karo barang rampasan,

¹⁴bagéanmu ditambahké marang kita, kantong siji kanggo kita kabèh.”

¹⁵Hé anakku, uripmu aja niru mlakuné wong-wong mau, sikilmu adohna sangka dalané;

¹⁶awit sikilé wong kuwi gelis nuju memala, lan gelis yèn arep ngutahké getih.

¹⁷Awit tanpa guna masang jaring ing ngarepé manuk;

¹⁸nanging wong ala mau pada ngadang marang getihé déwé lan nyilakani nyawané déwé.

¹⁹Kaya mengkono mlakuné saben wong murka nggolèk rejeki nganggo tyara peteng, bakal ngrebut nyawané wong kuwi déwé.

²⁰Kawityaksanan mbengok banter ing dalan-dalan, lan nyuwara ing lapangan,

²¹enggoné mbengok ing enggokan dalan-dalan sing ramé, ing ngarepé gapurané kuta enggoné ngetokké tembung-tembungé.

²²“Hé wong sing ora nduwé pengalaman, nganti pira suwéné, enggonmu ijik nyenengi kahananmu kuwi, tukang moyok enggoné seneng memoyok lan wong bodo enggoné sengit marang kaweruh?

²³Pada madepa marang pamelèhku lan aku arep ngesokké rohku lan ngekèki weruh bab tembungku marang kowé.

²⁴Awit kowé nulak waktu tak undang, lan ora ana wong sing ngrèwès waktu aku ngelungké tanganku,

²⁵malah kowé pada nyepèlèkké pituturku lan ora gelem nampani pepélingku,

²⁶mulané aku ya bakal nggeguyu tyilakamu, lan nyokoraké yèn kowé katekan sing nggegirisi,

²⁷yèn kowé katekan sing nggegirisi kaya lésus, lan katekan ing bilai kaya lésus, lan katekan kangèlan lan kasusahan.

²⁸Ing kono bakal pada sambat marang aku, nanging ora bakal tak sauri, senajan temen-temen enggoné pada nggolèki aku, nanging ora bisa ketemu.

²⁹Awit pada sengit marang kaweruh lan ora milih wedi lan ngajèni marang GUSTI,

³⁰pada emoh nampani pituturku, lan pada nampik marang sak kabèhé pamelèhku,

³¹mulané bakal pada mangan paité wohé penggawéané, lan pada warek karo rantyamané déwé.

³²Awit wong sing tanpa pengalaman kuwi bakal dipatèni awit wangkoté; lan wong bodo bakal dientèkké karo sembranané.

³³Nanging sapa sing nggugu marang aku, kuwi bakal manggon aman, dipageri sangka tyilaka sing nggegirisi.”