Read Caribbean Javanese Wulang Bebasan 10 Bible Online

Wulang Bebasan 10 - Caribbean Javanese bible

Wulang Bebasan 10

¹Wulang bebasané Salomo, Anak sing wityaksana ndadèkké bungahé bapaké, nanging anak sing goblok kuwi nggawé kasusahané ibuné.

²Banda, olèh-olèhé tumindak duraka kuwi ora maédahi, nanging kabeneran kuwi nylametaké wong sangka pati.

³GUSTI ora négakké wong bener ngalami kaliren, nanging kepénginané wong duraka ditampik.

⁴Tangan sing males ndadèkké mlarat, nanging tangané wong sregep kuwi ndadèkké sugih.

⁵Sapa sing nglumpukké ing waktu panas, kuwi pinter, nanging sing turu waé ing waktu panèn, kuwi nggawé isin.

⁶Berkah kuwi manggon ing sirahé wong bener, nanging tutuké wong duraka kuwi ndelikké penggawé ala.

⁷Pengéling-éling marang wong bener kuwi ngekèki berkah, nanging jenengé wong duraka dadi bosok.

⁸Sapa sing wityaksana ing ati, kuwi nggatèkké marang pepakon, nanging sing bodo ing tetembungan, kuwi bakal tiba.

⁹Sapa sing resik kelakuané kuwi tentrem mlakuné, nanging sing nandangi mlintat-mlintut, bakal konangan.

¹⁰Sapa sing kedèp-kedèp mripaté, kuwi nukulaké kasusahan, nanging sing bodo ing tetembungan, kuwi bakal tiba.

¹¹Tutuké wong bener kuwi sumberé urip, nanging tutuké wong duraka, kuwi ndelikké penggawé ala.

¹²Sengit ndadèkké tukaran, katrésnan nutupi sak kabèhé panerak.

¹³Lambéné wong pinter kuwi ana kawityaksanané, nanging gegeré wong tanpa pikiran kuwi dityepaki pentung.

¹⁴Wong wityaksana kuwi nglumpukké kaweruh, nanging tutuké wong bodo kuwi karusakan sing ngantyam.

¹⁵Bandané wong sugih kuwi kanggo kutané sing kuwat, nanging sing njalari karusakané wong mlarat kuwi kemlaratan.

¹⁶Upahé penggawéné wong bener kuwi nuntun marang urip, olèh-olèhé wong duraka kuwi nuntun marang dosa.

¹⁷Sapa sing nampani piwulang nuju marang dalané urip, nanging sing nglalèkké marang pamelèh kuwi kesasar.

¹⁸Sapa sing ndelikké sengité kuwi goroh lambéné, lan wong sing tukang ngèlèk-èlèk kuwi wong bodo.

¹⁹Sing okèh gunemané kuwi mesti ana paneraké, nanging sing ngendek lambéné kuwi kanggonan kepinteran.

²⁰Ilaté wong bener kuwi kaya slaka pilihan, nanging pikirané wong duraka kuwi setitik ajiné.

²¹Lambéné wong bener kuwi dadi pangoné wong okèh, nanging wong bodo mati, awit tyupet pikirané.

²²Berkahé GUSTI kuwi sing nyugihké, ora awit ditambahi karo rekasané déwé.

²³Sing dadi kabungahané wong bodo kuwi yèn nglakoni penggawé ala, nanging wong pinter kuwi senengé yèn olèh kawityaksanan.

²⁴Wong duraka katekan apa sing disumelangké, nanging wong bener bakal dikèki apa sing dikarepké.

²⁵Yèn katekan karo lésus, wong duraka entèk, nanging wong bener kuwi dasaré langgeng.

²⁶Kaya tyukak kanggo untu lan kebul kanggo mripat, ya mengkono kuwi wong males kanggo sing ngongkon.

²⁷Wedi lan ngajèni marang GUSTI kuwi ndawaké umur, nanging taun-tauné wong duraka kuwi dityendekké.

²⁸Pengarep-arepé wong bener kuwi dadi kabungahan, nanging pengarep-arepé wong duraka dadi tanpa guna.

²⁹Dalané GUSTI kuwi pengayoman kanggo wong sing jujur, nanging kanggo wong sing nglakoni ala dadi karusakan.

³⁰Wong bener ora bakal diontang-antingké selawasé, nanging wong duraka ora bakal manggon ing negara.

³¹Tutuké wong bener ngetokké kawityaksanan, nanging ilat rangkep kuwi diketok.

³²Lambéné wong bener weruh samubarang sing betyik, nanging tutuké wong duraka mung nglairké sing ala.