Read Caribbean Javanese Wulang Bebasan 11 Bible Online

Wulang Bebasan 11 - Caribbean Javanese bible

Wulang Bebasan 11

¹Timbangan sing goroh kuwi disengiti karo GUSTI, nanging watu timbangan sing tyotyok ndadèkké senengé Gusti.

²Yèn kesombongan teka, pemoyok uga nututi, nanging kawityaksanan manggon ing wong sing andap asor.

³Wong sing jujur kuwi ketuntun karo katemenané, nanging wong goroh kuwi dirusak karo ora bèrèsé.

⁴Yèn bebendu teka, kasugihan ora migunani, nanging kabeneran ngluwari sangka pati.

⁵Dalané wong bener dirata karo kebenerané, nanging wong duraka tiba awit sangka dosané.

⁶Wong sing jujur ditulungi karo kebenerané, nanging wong goroh kuwi kejiret karo hawa srakahé.

⁷Pengarep-arepé wong duraka gagal waktu dina patiné, nanging pengarep-arepé wong ala bakal tanpa guna.

⁸Wong bener dietokké sangka kangèlan, terus wong duraka sing nggentèni.

⁹Wong duraka ngrusak sak pepadané karo tutuké, nanging wong bener ditulungi karo kaweruhé.

¹⁰Kabekjané wong bener, ndadèkké kabungahané wong sak kuta, lan yèn wong duraka entèk, wong pada ramé surak-surak.

¹¹Berkahé wong jujur ndadèkké mekaré kuta, nanging tutuké wong duraka njalari ambruké.

¹²Sapa sing ngrèmèhké sak pepadané kuwi tanpa pikiran, nanging wong sing pinter kuwi meneng waé.

¹³Sapa sing nyatyat, kuwi mbukak perkara, nanging wong setia nutupi perkara.

¹⁴Yèn tanpa penggedéné, bangsa ambruk, nanging yèn tukang rembuké okèh terus ana katentreman.

¹⁵Sapa sing nanggung wong liyané sing durung dikenal, kuwi bakal sangsara banget, nanging wong sing ora njukuk tanggung jawap, kuwi slamet.

¹⁶Wong wadon sing apik atiné bakal kajèn, mengkono wong sugih olèh kasugihan.

¹⁷Wong sing welas ati mbetyiki awaké déwé, nanging sing kereng kuwi nyiksa awaké déwé.

¹⁸Wong duraka olèh gawé sing tanpa guna, nanging sapa sing nyebar kabeneran olèh berkah sing tetep.

¹⁹Sapa sing nggondèli kabeneran sing sejati kuwi nuju marang urip, nanging sapa nguber sing ala kuwi marani pati.

²⁰Wong sing atiné lityik, kuwi ala ing ngarepé GUSTI, nanging para wong sing tanpa tyiri, ndadèkké senengé Gusti.

²¹Tenan, wong ala mesti nampa ukuman, nanging turunané wong bener bakal ditulungi.

²²Kaya anting-anting emas ing tyongoré babi, ya kaya mengkono kuwi wong wadon ayu sing ora wityaksana.

²³Pengarep-arepé wong bener nekakké kabekjan, nanging pengarep-arepé wong duraka nekakké bebendu.

²⁴Ana sing ngawut-awut bandané, nanging mundak sugih, lan ana sing medit banget, senajan mengkono tansah kekurangan.

²⁵Sapa sing kerep ngedum berkah, bakal nampani kalubèran, sapa sing ngekèki ngombé, bakal diwènèhi ngombé.

²⁶Sapa sing ndelikké gandum, mesti dionèk-onèké karo wong nanging wong sing ngedol gandum, sirahé bakal katekan berkah.

²⁷Sapa sing nggolèki kabetyikan, kuwi ngupaya supaya disenengi karo wong, nanging sing ngarah marang sing ala, bakal katekan karo memala.

²⁸Sapa sing ngendelké marang kasugihané bakal ambruk, nanging wong bener bakal semi kaya godong nom.

²⁹Sapa sing ngésruhké brayaté, bakal olèh angin, wong bodo bakal dadi baturé wong wityaksana.

³⁰Upahé wong bener kuwi wit panguripan, lan sapa sing wityaksana kuwi bisa narik atiné wong.

³¹Yèn wong bener olèh balesan ing ndonya, luwih menèh wong duraka lan wong dosa!