Read Caribbean Javanese Wulang Bebasan 12 Bible Online

Wulang Bebasan 12 - Caribbean Javanese bible

Wulang Bebasan 12

¹Sapa sing seneng diélingké kuwi seneng marang kaweruh, nanging sapa sing nampik pamelèh kuwi bodo.

²Wong betyik ndadèkké senengé GUSTI, nanging tukang ngapusi kuwi mesti diukum.

³Manungsa ora bisa dadi kuwat karo durakané, nanging oyoté wong bener ora owah gingsir.

⁴Wong wadon sing pinter kuwi kanggo makutané sing lanang, nanging sing nggawé wirang bojoné kuwi kaya waé lara sing ngroposké balungé.

⁵Rantyamané wong bener kuwi adil, nanging rantyamané wong duraka kuwi goroh.

⁶Tembungé wong duraka kuwi nantang getih, nanging tembungé wong temen kuwi mitulungi.

⁷Para wong duraka pada ditibakké nganti entèk, nanging omahé wong bener kuwi tetep ngadek.

⁸Saben wong kuwi enggoné dipuji miturut tindak-tanduké, nanging wong goroh kuwi dirèmèhké.

⁹Luwih apik dadi wong tyilik, nanging nduwé batur, tenimbang wong sing ngunggul-unggulké déwé, nanging kekurangan pangan.

¹⁰Wong bener mikir marang kebutuhané kéwané, nanging wong duraka kuwi kereng.

¹¹Wong sing nggarap lemahé bakal warek rejekiné, nanging sing nguber barang tanpa guna kuwi tanpa pikiran.

¹²Wong duraka kepéngin nduwèni jalané wong ala, nanging oyoté wong bener nekakké pengasilan.

¹³Wong ala kejiret karo kesalahané lambéné, nanging wong bener bisa utyul sangka kangèlan.

¹⁴Saben wong kewareken kabetyikan awit sangka wohé tembungé, lan wong nampa walesan sangka penggawéné tangané.

¹⁵Wong bodo ngarani mlakuné déwé wis betyik, nanging sapa sing nampani pituduh kuwi wityaksana.

¹⁶Bodo, wong sing ngomongké larané atiné sak nalika kuwi uga, nanging wong sing ora perduli marang pemoyok kuwi wityaksana.

¹⁷Wong sing nglairké kabeneran kuwi ngomongké apa sing adil, nanging seksi goroh nekakké sing ala.

¹⁸Ana wong sing lantyang tembungé kuwi kaya waé sudukané pedang, nanging ilaté wong wityaksana nekakké kewarasan.

¹⁹Lambé sing ngomongké katemenan kuwi tetep selawasé, nanging ilat goroh mung kanggo sak kedèpé mripat.

²⁰Wong sing ngrantyam ala kuwi atiné meteng kadurakan, nanging wong sing ngomongi bab katentreman kuwi nemu kabungahan.

²¹Wong bener ora bakal katekan tyilaka apa waé, nanging wong duraka kuwi tansah sangsara.

²²Lambé sing goroh kuwi sing njijiki kanggo GUSTI, nanging wong sing setia kuwi ndadèkké senengé Gusti.

²³Wong sing wityaksana kuwi ndelikké kaweruhé, nanging atiné wong bodo mamèrké kabodoané.

²⁴Tangané wong sregep kuwi nyekel pangwasa, nanging sing males kena penggawéan peksa.

²⁵Sumelangé ati ndadèkké bungkuké wong, nanging tembung sing apik kuwi ndadèkké senengé atiné.

²⁶Wong bener kuwi nemu panggonané, nanging dalané wong duraka nasarké.

²⁷Wong males ora bakal nyekel sing diuber, nanging wong sregep bakal olèh barang sing ana ajiné.

²⁸Urip kuwi ketemu ing dalané kabeneran, nanging dalané wong murtad nuju ing pati.