Read Caribbean Javanese Wulang Bebasan 13 Bible Online

Wulang Bebasan 13 - Caribbean Javanese bible

Wulang Bebasan 13

¹Anak sing wityaksana ngrungokké marang piwulangé bapaké nanging wong seneng memoyok ora ngrèwès marang pamelèh.

²Wong bener mesti mangan sing betyik sangka tembungé, nanging karepé wong goroh kuwi rupa penggawé ala.

³Wong sing njaga tutuké, kuwi njaga nyawané, sapa sing tyrèwèt, kuwi bakal katekan ing karusakan.

⁴Atiné wong males kuwi kebak kepénginan, nanging tanpa guna, nanging atiné wong sregep kuwi dikèki kalubèran.

⁵Wong sing bener kuwi sengit marang goroh, nanging wong duraka kuwi nggawé wirang lan nggawé alané awaké déwé.

⁶Wong sing mlakuné sutyi kuwi dijaga karo kebenerané, nanging sing nggawé dosa digawé sangsara karo durakané.

⁷Ana wong sing sumugih, nanging ora nduwé apa-apa, ana uga sing étok-étok mlarat, nanging bandané okèh.

⁸Kasugihan kuwi kanggo nebus nyawané wong, nanging wong mlarat ora bakal krungu antyaman.

⁹Pepadangé wong bener kuwi semlorot gemebyar, nanging dimaré wong duraka bakal mati.

¹⁰Kesombongan kuwi mung ndadèkké tukaran, nanging wong sing ngrungokké pitutur kanggonan kawityaksanan.

¹¹Banda sing gampang olèhé, mesti bakal suda, nanging wong sing tlatèn nglumpukké sangka setitik, bakal dadi sugih.

¹²Pengarep-arep sing durung klakon, nggawé sedihé ati, nanging kepénginan sing keturutan kuwi wité panguripan.

¹³Sapa sing ngrèmèhké tembungé, kuwi bakal nanggung resikoné, nanging sapa sing miturut marang préntah, kuwi bakal nampa balesan.

¹⁴Piwulangé wong wityaksana kuwi sumberé urip, ndadèkké wong ora kena karo jiret-jireté pati.

¹⁵Pikiran sing apik ngekèki kawelasan, nanging dalané wong goroh kuwi ndadèkké tyilakané wong kuwi.

¹⁶Wong sing ati-ati nandangi karo kapinteran, nanging wong bodo ngetokké bodoné.

¹⁷Kongkonan sing duraka kuwi njalari tyilaka, nanging kongkonan sing setia nekakké kuwarasan.

¹⁸Kemlaratan lan pemoyok kuwi bakal nekani marang wong sing nglalèkké marang piwulang, nanging sapa sing nampani pamelèh kuwi kajèn.

¹⁹Kepénginan sing keturutan kuwi nyenengké ati, nanging wong bodo ora gelem ninggal sing ala.

²⁰Sapa sing sesrawungan karo wong wityaksana, dadi wityaksana, nanging sapa sing kekantyan karo wong bodo kuwi nemu sangsara.

²¹Wong dosa diuber karo tyilaka, nanging wong bener kuwi diwales kabekjan karo Panjenengané.

²²Wong betyik ninggali warisan marang anak putuné, nanging barang duwèké wong dosa kuwi disimpen kanggo wong bener.

²³Tegalé wong mlarat ngetokké pangan okèh, nanging ana sing ilang awit ora ana keadilan.

²⁴Sapa sing ora nggunakké gitik, kuwi sengit marang anaké, nanging sing trésna marang anaké kuwi ngekèki piwulang ing wantyiné.

²⁵Wong bener mangan nganti warek, nanging wetengé wong duraka ngrasakaké kekurangan.