Read Caribbean Javanese Wulang Bebasan 16 Bible Online

Wulang Bebasan 16 - Caribbean Javanese bible

Wulang Bebasan 16

¹Manungsa bisa nimbang-nimbang ing sak njeruhné ati, nanging jawabané ilat kuwi asal-usulé sangka GUSTI.

²Wong pada ngarani resik marang dalané, miturut panemuné déwé-déwé, nanging GUSTI sing njajal ati.

³Kabèh penggawému dipasrahké marang GUSTI, mesti sak kabèhé rantyamanmu bakal kelakon.

⁴GUSTI enggoné nggawé samubarang kuwi karo tujuané déwé-déwé, malah wong duraka kuwi ditemtokké kanggo dinané tyilaka.

⁵Sapa sing sombong kuwi njijiki kanggo GUSTI, tenan, wong kuwi ora bakal mlèsèt sangka paukuman.

⁶Katrésnan lan kasetian kuwi njalari dosa dingapura, wedi lan ngajèni marang GUSTI kuwi dalané wong ngedohi sing ala.

⁷Yèn ana wong sing mlakuné ndadèkké senengé GUSTI, kuwi uga satruné ya dirukunké karo wong mau.

⁸Luwih betyik pametuné setitik karo sing bener, tenimbangané pametuné okèh tanpa keadilan.

⁹Atiné manungsa mikir-mikirké dalané, nanging GUSTI sing nentokké mlakuné.

¹⁰Putusan sangka Gusti Allah, kuwi ing lambéné ratu, yèn enggoné ngadili tutuké ora nandangi kliru.

¹¹Timbangan lan ukuran sing sejati kuwi duwèké GUSTI, lan sak kabèhé bandul-timbangan ing kantong kuwi gawèan-Né.

¹²Njijiki kanggo ratu yèn nindakké duraka, nanging sing nguwatké damparé kuwi kabeneran.

¹³Lambé sing nglairké kabeneran kuwi ndadèkké senengé ratu, lan Panjenengané nrésnani wong sing tembung-tembungé jujur.

¹⁴Nesuné ratu kuwi kongkonané pati, nanging wong wityaksana ngademaké.

¹⁵Praupané ratu sing semlorot kuwi njalari urip, lan kabetyikan kaya mendungé udan ing waktu ketiga.

¹⁶Olèh kawityaksanan kuwi nyatané ngungkuli olèh emas, lan olèh pangertèn ngungkuli olèh slaka.

¹⁷Ngedohi sing ala kuwi dalané wong jujur, sapa sing njaga marang mlakuné kuwi njaga nyawané.

¹⁸Kementus kuwi ndisiki karusakan, lan gemunggung kuwi ndisiki ambruk.

¹⁹Betyik ngasorké urip nunggal karo para wong andap asor, tenimbangané karo ngedum rayahané ing tengahé wong gemunggung.

²⁰Sapa sing nggatèkké tembungé bakal nemu sing betyik, lan rahayu wong sing pertyaya marang GUSTI.

²¹Wong wityaksana kuwi diarani nduwé pangertèn, lan tembung alus kuwi luwih bisa ngeyakinké.

²²Kapinteran kuwi sumberé urip kanggo sing nduwèni, wong bodo disiksa karo bodoné.

²³Atiné wong wityaksana minterké tutuké, lan ndadèkké lambéné luwih bisa ngeyakinké.

²⁴Tetembungan sing sedep kuwi kaya madu, rasané legi kanggo ati lan dadi ngleremké balung.

²⁵Ana dalan sing dikira bener karo wong, nanging pungkasané nuju ing pati.

²⁶Rasa ngelih kuwi ndadèkké wong nyambutgawé, awit tutuké sing meksa wong kuwi.

²⁷Wong sing tanpa guna nduduk juglangan sing ala, lan ing lambéné kaya ana geni sing nggosongké.

²⁸Wong sing ora jujur ndadèkké tukaran, lan wong sing seneng ngarani ala kuwi misahké kantya jajiné.

²⁹Wong sing seneng nyiksa nasarké sak pepadané, lan nuntun ing dalan sing ora bener.

³⁰Sapa sing nutup mripaté kuwi ngrantyam tindak duraka, sing ngingkemké lambéné kuwi wis nglakoni sing ala.

³¹Rambut uwanen kuwi makuta sing apik, sing ketemu ing dalané kabeneran.

³²Wong sing sabar kuwi ngungkuli pahlawan, wong sing bisa ngwasani awaké, kuwi ngungkuli wong sing bisa ngrebut negara.

³³Lotré dibuwang ing pangkon, nanging kabèh putusané kuwi sangka GUSTI.