Read Caribbean Javanese Wulang Bebasan 17 Bible Online

Wulang Bebasan 17 - Caribbean Javanese bible

Wulang Bebasan 17

¹Pilih roti garing sak iris karo tentrem, tenimbangané mangan daging sak omah karo engkèl-engkèlan.

²Abdi sing karo pikiran kuwi bisa ngwasani marang anak sing mirang-mirangké, malah mèlu olèh warisan bebarengan karo para seduluré botyah kuwi.

³Pawon obongan kuwi kanggo nglebur slaka lan prapèn kanggo nglebur emas, nanging GUSTI sing njajal ati.

⁴Wong sing nindakké sing ala nggatèkké lambé duraka, lan wong goroh ngrungokké kupingé marang ilat sing nggawé tyilaka.

⁵Sapa sing ora ngajèni marang wong mlarat kuwi ngèlèk-èlèk marang Sing Nggawé, lan sing bungah awit ana tyilaka kuwi mesti bakal nampani paukuman.

⁶Makutané para wong tuwa kuwi anak putuné, lan sing kanggo kehormatané anak-anak kuwi para leluhuré.

⁷Wong bodo kuwi ora pantes ngetokké tembung-tembung sing apik, malah menèh wong luhur ngutyapké tembung goroh.

⁸Duwit besel kuwi kanggo sing ngekèki kaya diaman sing apik, karo besel nyangka, menyanga ngendi waé parané, tansah olèh untungé.

⁹Wong sing nutupi kesalahan kuwi nggolèki kawelasan, nanging sapa sing ngudal-ngudal perkara kuwi misahaké kekantyan.

¹⁰Disenèni sepisan kanggo wong sing nduwé pikiran, mlebuné luwih jeru tenimbangané disabeti dibalèni kaping 100, kanggo wong goblok.

¹¹Wong duraka kuwi mung tansah golèk sing ala, nanging kongkonan sing tanpa melas bakal nekani wong mau.

¹²Luwih betyik ketemu bruwang wédok sing kélangan anaké, tenimbangané karo kepetuk wong goblok awit bodoné.

¹³Sapa sing mbales ala marang kabetyikan, sing ala ora bakal adoh sangka omahé.

¹⁴Miwiti tukaran kuwi kaya mbedah bendungan, mulané mundura sak durungé wiwit tukaran.

¹⁵Mbenerké wong duraka lan nyalahké wong bener, kuwi loro-loroné disengiti karo GUSTI.

¹⁶Apa gunané wong goblok nggegem duwit kanggo tuku kawityaksanan, awit wong kuwi tanpa pikiran?

¹⁷Kantya kuwi ing saben waktu ajek waé katrésnané, lan dadi sedulur ing sak njeruhné kasusahan.

¹⁸Wong sing tanpa pikiran ya kuwi wong sing nganakké persetujuan, sing saguh nanggung sak pepadané.

¹⁹Wong sing seneng tukaran ya seneng marang panerak, lan sapa sing ngapikké lawangé kuwi nggolèki karusakan.

²⁰Wong sing atiné goroh ora bakal nemu kabekjan, sing muter-muter ilaté bakal tiba ing tyilaka.

²¹Sapa sing nduwé anak goblok, kuwi kasusahan, lan bapaké wong bodo sepi ing kabungahan.

²²Ati sing bungah kuwi kanggo obat sing mujarap, nanging ilangé semangat kuwi ngroposké balung.

²³Wong duraka nampani besel sangka kantong, kanggo ndoyongké keadilan.

²⁴Panemuné wong sing nduwé pangertèn kuwi tumuju marang kawityaksanan, nanging mripaté wong bodo kluyuran tekan ing pungkasané bumi.

²⁵Anak sing bodo kuwi nggawé larané atiné bapaké, lan kasusahané ibuné.

²⁶Ndenda wong bener kuwi tumindak sing salah, lan nyabeti wong luhur kuwi uga ora pantes.

²⁷Wong pinter kuwi bisa ngempet tembungé, lan wong sing nduwé kapinteran kuwi anteng ing pikiran.

²⁸Uga wong bodo yèn anteng ya bakal dikira wityaksana, lan yèn mingkemké lambéné ya dikira nduwé kapinteran.