Read Caribbean Javanese Wulang Bebasan 18 Bible Online

Wulang Bebasan 18 - Caribbean Javanese bible

Wulang Bebasan 18

¹Wong sing ndéwé, kuwi nggolèki kepénginané, saben panimbang njalari nesuné.

²Wong bodo kuwi ora seneng marang pangertèn, mung seneng ngelèr-ngelèr isiné atiné.

³Yèn duraka kuwi teka, teka uga ngrèmèhké, lan tyiri kuwi dibarengi pemoyok.

⁴Tembungé tutuké wong kuwi kaya banyu sing jeru, nanging sumber kawityaksanan, kuwi kaya kali sing mili.

⁵Ora betyik ngetutké wong duraka, karo nampik wong bener ing pengadilan.

⁶Lambéné wong bodo njalari tukaran, lan tutuké bengak-bengok njaluk disabeti.

⁷Wong bodo nemoni karusakan awit sangka tutuké, lan lambéné dadi jiret kanggo nyawané.

⁸Tembungé wong seneng ngarani ala kuwi kaya panganan sing énak-énak, sing mlebu ing sak njeruhné ati.

⁹Wong sing males sak njeruhné nindakké penggawéané, kuwi wis dadi seduluré juru pengrusak.

¹⁰Asmané GUSTI kuwi menara sing kuwat, wong bener pada ngungsi mrana nganti slamet.

¹¹Kanggo wong sugih kuta sing kuwat kuwi banda duwèké, dirasa kaya témbok sing duwur.

¹²Sombong ndisiki karusakan, nanging andap asor kuwi dalané kajèn.

¹³Yèn wong nyauri sak durungé ngrungokké, kuwi bodo lan tyiri.

¹⁴Kentyengé ati ndadèkké kuwat ngalami sangsara, nanging sapa sing bisa mulihké semplaké ati?

¹⁵Atiné wong pinter ngekèki kapinteran, lan kupingé wong wityaksana nggolèki kapinteran.

¹⁶Berkah njembarké dalané wong, lan ngeterké ing ngarepé wong luhur.

¹⁷Sing guneman ndisik ing sak njeruhné para padu, kaya-kaya kuwi sing bener, nanging bareng ana wong liyané sing teka, perkarané terus dipréksa.

¹⁸Tibané lotré mungkasi padu, lan ngrampungké perkara ing antarané wong-wong sing nduwèni pangwasa.

¹⁹Sedulur sing dilarakké atiné, luwih angèl dityedaki tenimbang karo nyedaki kuta sing kuwat, lan tukaran kuwi kaya sloroké gapurané bèntèng.

²⁰Wetengé wong kuwi karo pametuné tutuké, lan karo pametuné lambéné.

²¹Pati lan urip pada dipréntah ing ilat, sapa sing seneng, kuwi mesti mangan wohé.

²²Sapa sing olèh jodo kuwi nemu bab sing betyik, lan olèh kawelasané GUSTI.

²³Wong mlarat memelas omongé, nanging wong sugih kasar semauré.

²⁴Ana kantya sing ndadèkké sangsara, nanging uga ana kantya sing rumaketé ngungkuli sedulur.