Read Caribbean Javanese Wulang Bebasan 19 Bible Online

Wulang Bebasan 19 - Caribbean Javanese bible

Wulang Bebasan 19

¹Luwih apik wong mlarat sing kelakuané resik, tenimbangané karo wong goroh lambéné lan bodo.

²Tanpa kaweruh kesregepan uga ora maédahi, lan sing kesusu kuwi bakal kliru jangkahé.

³Kabodoané wong nasarké mlakuné, terus bingung atiné marang GUSTI.

⁴Kasugihan ngekèki kantya okèh, nanging wong mlarat, ditinggal kantyané.

⁵Seksi goroh mesti bakal nampani paukuman, lan wong sing ngutyapké goroh ora bakal utyul sangka paukuman.

⁶Akèh sing ngupaya ngrogoh atiné wong sing penting, lan saben wong kepéngin dadi kantyané wong sing seneng pawèh.

⁷Wong mlarat kuwi disengiti karo seduluré kabèh, apa menèh kantyané, mesti pada ngedohi, diuyak karo dityeluki, nanging wongé wis pada ora kétok.

⁸Sapa sing kanggonan kepinteran, kuwi nrésnani awaké déwé, sing nggunakké kaweruh, bakal nemu beja.

⁹Seksi goroh mesti bakal nampani paukuman, lan sing ngutyapké goroh bakal entèk.

¹⁰Wong bodo ora pantes olèh urip kepénak, apa menèh batur ora pantes mréntah para penggedéné.

¹¹Kapinteran njalari wong sabar banget, lan dipuji awit ngapura wong sing salah.

¹²Nesuné ratu kuwi kaya nggeruhné singa enom, nanging kabetyikan kuwi kaya ebun sing tiba ing suketan.

¹³Anak sing bodo kuwi dadi tyilakané bapaké, paduné wong wadon kuwi kaya trotyohé payon sing tanpa mandek.

¹⁴Omah lan banda kuwi warisan sangka leluhuré, nanging bojo wadon sing pinter kuwi pawèhé GUSTI.

¹⁵Males kuwi ndadèkké turu kepati, nanging wong wegahan bakal ngalami ngelih.

¹⁶Wong sing netepi pepakon, kuwi njaga nyawané, nanging sing ngrèmèhké tembungé Gusti, bakal mati.

¹⁷Sapa sing melasi marang wong sing ringkih, kuwi ngutangi marang GUSTI, Panjenengané sing bakal mbales penggawéné kuwi.

¹⁸Anakmu rangkèten sak suwéné ijik ana pengarep-arep, nanging aja nganti ndadèkké patiné.

¹⁹Wong sing gelis banget nesuné, bakal kena denda, awit yèn kowé njajal arep nulungi, malah tambah nesuné.

²⁰Ngrungokna pitutur lan nampanana piwulang, supaya kowé mbésuk bisa dadi wityaksana.

²¹Atiné wong ngrantyam-ngrantyam perkara okèh, nanging putusané GUSTI kuwi sing bakal kelakon.

²²Watek sing dikepéngini kanggo wong kuwi kasetian, luwih betyik wong mlarat tenimbangané karo wong sing ngapusi.

²³Wedi lan ngajèni marang GUSTI ngekèki urip, wong terus bakal turu karo seneng ora bakal katekan karo tyilaka.

²⁴Wong males nyelupké tangané ing mangkok, nanging ora mbalèkké ing tutuké.

²⁵Yèn wong seneng memoyok kok sabet, banjur wong sing tanpa pengalaman bakal dadi wityaksana, yèn wong karo pikiran kok welèhké, bakal ngrumangsani.

²⁶Anak sing nglarani bapaké utawa nundung ibuné, kuwi ngèlèkké lan mirang-mirangké awaké déwé.

²⁷Hé anakku, aja ngrungokké piwulang menèh, yèn kowé ya nyimpangi pitutur sing ngekèki kaweruh.

²⁸Seksi sing ora ana gunané kuwi ngrèmèhké angger-angger, lan tutuké wong duraka nguntal goroh.

²⁹Wong memoyok dityepaki paukuman, lan gegeré wong bodo dityepaki gepuk.