Read Caribbean Javanese Wulang Bebasan 2 Bible Online

Wulang Bebasan 2 - Caribbean Javanese bible

Wulang Bebasan 2

¹Hé anakku, yèn kowé nampani tembung-tembungku, lan nyimpen préntah-préntahku ing atimu,

²nganti kupingmu nggatèkké marang kawityaksanan, lan atimu kok adepaké marang kapinteran,

³lan yèn kowé njaluk tulung marang pangertèn, lan nujukké swaramu marang kapinteran,

⁴yèn kuwi kok upaya kaya nggolèk slaka, lan kok uber kaya nguber banda kependem,

⁵kowé terus bakal nemu pangertèn bab wedi lan ngajèni marang GUSTI lan olèh kaweruh bab Gusti Allah.

⁶Awit GUSTI sing ngekèki kawityaksanan, sangka tutuké Gusti metu kaweruh lan kapinteran.

⁷Panjenengané nyepakké pitulungan marang wong sing jujur, Panjenengané kuwi dadi tamèngé para wong sing mlakuné tanpa tyiri

⁸Panjenengané njaga mlakuné keadilan, lan njaga mlakuné para duwèk-E ya kuwi wong sing pada setia.

⁹Mengkono dadiné kowé bakal ngerti bab kabeneran, keadilan, lan kejujuran, malah sak wernané dalan sing betyik.

¹⁰Awit kawityaksanan bakal mlebu ing atimu lan kaweruh kuwi bakal maremké nyawamu;

¹¹kaweruh bakal njaga kowé, lan pangertèn bakal ngrumati kowé,

¹²supaya kowé didohké sangka dalan sing ala, sangka wong sing ngomong goroh;

¹³sangka wong sing pada ninggal dalan sing lurus lan mlaku ing dalan sing peteng;

¹⁴sing seneng nindakké memala, lan surak-surak awit sangka durakané;

¹⁵sing ménggak-ménggok mlakuné lan sing keblinger tumindaké;

¹⁶uga menèh supaya kowé utyul sangka wong wadon lonté, sing lunyu tembung-tembungé,

¹⁷sing ninggal bojoné sing pisanan, lan lali marang perjanjiané Gusti Allah;

¹⁸sakjané omahé ilang ambles ing njeruhné pati, lan dalané nuju ing panggoné roh-roh peteng.

¹⁹Sapa sing marani wong kuwi, ora bisa bali, lan ora bisa tekan ing dalané urip.

²⁰Mulané mlakua ing dalané wong sing betyik, nirua mlakuné wong bener.

²¹Awit wong jujur sing bakal pada ngenggoni negara, lan para wong sing tanpa tyiri bakal pada tetep manggon ing kono,

²²nanging para wong ala bakal pada dientèkké sangka negara kuwi, lan wong sing laku goroh bakal pada dibuwang sangka kono.