Read Caribbean Javanese Wulang Bebasan 21 Bible Online

Wulang Bebasan 21 - Caribbean Javanese bible

Wulang Bebasan 21

¹Atiné ratu kuwi kaya ilèn-ilèn banyu ing tangané GUSTI, diilèkké miturut karo kekarepan-Né piyambak.

²Saben wong ngarani dalané déwé kuwi sing bener, nanging GUSTI sing nguji ati.

³Nindakké kabeneran lan keadilan kuwi nggawé senengé atiné GUSTI ngungkuli kurban.

⁴Mripat sing sombong lan ati sing gemunggung, sing dadi dimaré wong duraka, kuwi dosa.

⁵Rantyamané wong sregep kuwi nekakké kalubèran, nanging saben wong sing gugupan kuwi mung bakal ngalami kekurangan.

⁶Olèh kasugihan karo ilat goroh kuwi barang sing tanpa guna, sing nggawa wong menyang pati.

⁷Wong duraka pada disèrèt karo panganiayané déwé, awit pada nulak nindakké keadilan.

⁸Dalané tukang ngapus kuwi ménggak-ménggok, nanging wong jujur kuwi jejek mlakuné.

⁹Luwih betyik manggon ing pojoké payon, tenimbangané manggon sak omah karo wong wadon sing seneng padu.

¹⁰Atiné wong duraka kuwi kepéngin marang sing ala, lan ora nduwèni kawelasan marang sak pepadané.

¹¹Yèn wong seneng memoyok diukum, wong sing ora nduwé pengalaman dadi wityaksana, lan yèn wong wityaksana diwulangi, bakal olèh kaweruh.

¹²Sing Mahaadil ndelok omahé wong duraka, lan njongkroké wong duraka menyang tyilaka.

¹³Sapa sing nutupi kupingé marang sambaté wong mlarat, yèn sambat-sambat déwé, ora bakal dituruti.

¹⁴Pawèh karo meneng-meneng ngleremké nesu, lan pisungsung sing karo meneng-meneng nyirep nesu sing nggegirisi.

¹⁵Nindakké keadilan kuwi dadi kesenengané wong bener, nanging nggawé wediné wong sing nandangi ala.

¹⁶Wong sing nyimpang sangka dalané kepinteran, kuwi bakal lèrèn ing panggonan nglumpukké para rohé wong mati.

¹⁷Wong sing seneng sukak-sukak bakal ngalami kekurangan, lan sing kesenengané anggur lan lenga ora bakal bisa sugih.

¹⁸Wong duraka kuwi kanggo tebusané wong bener, sing goroh kanggo gantiné sing jujur.

¹⁹Luwih betyik manggon ing ara-ara samun, tenimbang manggon karo wong wadon sing seneng padu lan seneng nesu.

²⁰Omahé wong wityaksana kanggonan banda lan lenga, nanging wong sing bodo ngentèk-entèkké kuwi.

²¹Wong sing ngupaya marang kabeneran lan katrésnan, bakal nemu urip, kabeneran lan kehormatan.

²²Wong wityaksana bisa ngunggahi kutané para pahlawan, lan ngembrukké témbok sing dadi pengandelé.

²³Sapa sing njaga tutuké lan ilaté, dadi njaga awaké, utyul sangka kangèlan.

²⁴Wong sing ndugal lan gemunggung kuwi disebut wong seneng memoyok, pertingkahé kemetak banget.

²⁵Wong males dipatèni karo kepénginané déwé, awit tangané males nyambut nggawé.

²⁶Kepénginan nduwèni kuwi sedina-dina tansah mélik, nanging wong bener kuwi pawèh tanpa wates.

²⁷Kurbané wong duraka kuwi reget, luwih menèh yèn enggoné masrahaké karo karep ala.

²⁸Seksi goroh bakal entèk, nanging wong sing ngrungokké bakal ajek ngomong.

²⁹Wong duraka ora nduwé isin, nanging wong jujur nata dalané.

³⁰Ora ana kawityaksanan lan pangertèn, lan ora ana timbangan sing bisa madani GUSTI.

³¹Jaran dirakit kanggo ing waktu perang, nanging kemenangan kuwi ing tangané GUSTI.